Nongpoh, Nohprah 14: Kawei ka iing jong ka kong Jeh Mawiong bad u Bah Wordis Lyngdoh kiba ri ruh haduh 7 ngut ki khunswet nalor ki khun lade kila hap ban mad ïaka jingjia kaba sngewsih kthang hadien ba ka iing kaba ki shong ki sah kala ingkhong khait naduh ki jingdon jingem bad ki tiar ki tar haka shnong Jali Lum jong ka thaiñ Ri-Bhoi Sepngi.
Katei ka jingjia pluh ding kala jia haka 4 tarik Nohprah kaba la wanrah ruh ka jingduhnong kaba khraw nalor ba katei ka longiing ka dei kaba don hapdeng ka jingeh jingjynjar.
Halor katei ka jingjia naka liang ki nongïalam ka FKJGP Western Zone haka sngi Saitjaiñ hapoh ka jingïalam u Bah Center Doloi President haka jongdonlang u Bah Andres Tron Working President lem bad ki dkhot kila hiar sha ka shnong Jali Lum ban leit wad ïa katei ka longiing ryngkat ki song jingïarap naduh ki tiar ki tar ba pyndonkam ha iing, ki jaiñkup syaid bad kumjuh ruh ka pisa kum ka jingai mynsiem ban kyrshan ïa katei ka longiing ha kum kane ka por ba ki mad ïaka jingeh jingjynjar namar ki don ruh uwei u khun ba dang rit u ba don jingduna haki dkhot met.
Naka liang u Bah C Doloi haka jingdon ryngkat ki nongïalam shnong u la ong ba kum ka seng ka dap da ka jingsngewsih kaba jur halor katei ka jingjia bad ka jingeh ba mad da ka katei ka longiing bad kum ka seng tang hadien ka jingioh jingtip ïa katei ka jingjia kala pyrshang ban wad jingtip bad mar mar hadien ka jingioh jingtip ba ki nongïalam ka seng kila hiar sha katei ka shnong ban leit ai mynsiem bad kyrshan lem katba lah ka bor ïa katei ka longiing.
U la ong ruh ba katei ka jingleit ai mynsiem bad aiti da ki tiar ki tar ka dei tang naka jingsynñiang jong ki para dkhot ban ioh pynthied ïaki tiar donkam katba lah ei ryngkat ka jingduwai ba u Blei un dang kyrkhu bad pyntngen ïa katei ka longiing kaba mad ïaka jingeh.
