Shillong, Risaw, 11: Hapdeng ka aiom leh kmen Puja, kawei ka longiing ka la mad ïa ka jingduhnong bad ka jingsngewsih kaba khraw hadien ba ki thylliej ding kiba rhem ki la pynkylla dpei ïa ka iing, ka sem masi kynthup ruh ïa ki 15 tylli ki masi. La antad ba ka jingjulor ka la kot sha ka 20 lak tyngka eiei.
Kane ka iing ka dei ba la longtrai da u Sunil Kumar Rai uba shong basah ha ka Dong Kadiang jong ka shnong Nongmensong.
Ki briew kiba la sakhi ïa kane ka jingjia ki la pyntip ba ka jingkem ding jong ka ïing bad ka sem masi ka la sdang ha ka por kumba 1:00 baje noh sngi. Ïa ka jingsdang jong ka ding wat ki trai ïing ruh ki pynpaw ba kim lah satia ban tip.
Namar ka jingklang shaba palat jong ki thylliej ding, 15 tylli ki masi ba la set ha sem kaba don markhap bad ka iing ki la ingkhong bad baroh ki jingdon jingem jong ka iing ruh ki la kylla dpei kynthup ïa ka pisa, ki jaiñ ki nep bad kiwei kiwei ki tiar ba donkam.
Tang shu ïoh jingtip halor kane ka jingjia, ki Pulit pynlip ding jong ka tnat Fire and Emercency Service ki la leit mar mar ban tem ïa ka jingklang jong ka ding.
