Indian Women’s League: Shi dorjan pynbam ka Gokulam Kerala FC ïa ka Odisha FC

Shillong, Ïaïong 16: Ha ka jingïalehkai kaba la ïaid ar sngi jong ka lympung Indian Women’s League (IWL) 2022, ka Gokulam Kerala FC kala pynliem kput haduh shi dorjon ïa ka kynhun ïalehkai jong ka Odisha FC kata da 12-0 kol ha ka jingïakhun kaba long ha Capital Ground ha ka sngi Saitjaiñ.
Ha katei ka jingïalehkai ka Manisha Kalyan marwei kala khyrwit haduh san kol katba ka Elshaddai Acheampong ka thep ar kol. Ka Gokulam Kerala FC kaba bat ruh mynta ïa ka nam lahduh jong katei ka lympung kala lah ban ïalehkai bha naduh kaba sdang.
Kane ka kynhun hapoh ka jingïalam u Anthony Samson Andrews kum u Head coach kala pynkhlaiñ bha ïa ka kynhun ha ka rukom pynmih madan ïa ka kynhun ba 11 ngut.
Bad ha katei ka jingïalehkai ka Manisha Kalyan kaba dei ruh ka thei ïalehkai dang khie bad paw bha jong ka India kala lah shisha ban pynshohbiej ïa kiba bun ha ka rukom ïalehkai, ha kaba ka la lah da kaba suk ban thep ïa ki san kol katba ka Elshaddai Acheampong kala thep ïa ki ar kol hadien ba kala mih kum ka thei ïalehkai shongben.
Mar ba sdang ka jingïalehkai ka Gokulam Kerala FC kala ñion tyngeh ban thep kol. Ka kabu ba nyngkong ha kane ka jingïakhun kadei ha ka minit ïalehkai kaba phra hadien ba ka Soumya Goguloth kala rah ïa ka bol bad pashat sha khmat kaba la poi ha ki kjat jong ka Dangmei Grace.
Watla katei ka thei ïalehkai khmat ka la ïoh ban thep kol hynrei la ñiew ba kadei ka offside. Hynrei kane kam shym la pynduh mynsiem na bynta katei ka kynhun kaba la ju tip kum ka Malabrians ha kaba kala ïoh ban pynkhih jar syndon. Ha ka minit ba 17, ka Manisha Kalyan kala ïoh ban thep ïa ka shi kol lyngba ka kol kaba itynnad bha kaba la khyrwit na jngai jong ka dieng kol.
Lyngba kane ka kol kala ai mynsiem shuh shuh ïa ka kynhun kaba la pynjem khnap ïa ki thei ka Odisha, ha kaba ka Dalima Shhibber ha ka minit ba 25 kala rah bad pashat ïa ka bol sha ka Dangmei kaba la pashat pat sha ka Manisha kaba khlem pynlehnoh ei bad thep beit jlang shapoh kol.
Ka Gokulam Kerala FC kala bteng ban thep kol lyngba ka Win Theingi Tun ka thei ïalehkai bar ri jong ka Myanmar. Bad hadien katto katne minit ba la ïaid biang ka jingïalehkai ka Manisha Kalyan kala thep sa ïa ka kol kaba ar lyngba ka bol bala buh bha da ka Soumya.
Bad shwa ban kut ka kylla step katei ka thei ïalehkai ba dang 20 snem kala thep ïa ka kol ba lai (hat-trick ha kaba ka Gokulam Kerala FC kala lamkhmat lypa da 6-0.
Haba wanphai sha ka jingïakhun jong ka kylla miet, watla ka Gokulam Kerala FC kala lamkhmat da 60- pynban ki khlem ailad hynrei ki ïakhun tyngeh beit ban thep kol. Ka Manisha Kalyan hadien ba kala ïoh ïa ka bol kala pashat sha ka Dangmei bad katei ka thei ïalehkai shakhmat ka khlem ïoh ïa ka kabu kaba biang, pynban ka Gokulam kala ïoh ei ïa ka shi kol na ka jingbakla thep hi ka Madhusmita Barick shapoh kol lajong.
Ka Gokulam Kerala kala ailad sa ïa ka Elshaddai Acheampong ban mih madan ha kaba katei ka thei ïalehkai ba na Manipur kala ïarap thep ar kol na bynta ka kynhun. Ka Manisha kala thep sa ïa kol kaba san ha ka minit ba 73, bad ka kynhun kala pynliem syndon da 12-0 pyrshah ïa ka Odisha FC.