Indian Super League : Soi ka Mumbai FC ïa u Bhaskar Roy, Hyderabad ïa u Syal Joshy bad FC Goa ïa u Ayush Chhetri

Mumbai, Naitung 23 : Ka Mumbai City FC ka la pynbna ba la soi ïa u rangap kol u Bhaskar Roy da ka kontrak ba ar snem. U Bhaskar Roy ba 28 snem ka rta un ïalehkai bad katei ka kynhun kaba la ju tip kum ka Islanders haduh kaba kut jong u Jymmang 2024.
U Bhaskar, uba dei na Basunia Para, West Bengal, u la jop ïa ka Golden Glove ha ka I-League jong ka samoi 2021-22 ha ka por ba ïalehkai bad ka Rajasthan United FC. U la ïoh ban kem bol haduh phra sien bad 44 sien ki jingkyrda bol ha ki 17 sien ïalehkai na bynta ka Rajasthan United ha ka lympung ïalehkai I-League.
Utei u rangap kol u la ïoh ka jinghikai ba paka bha ha ka Sports Authority of India (SAI) Kolkata bad u la mihkhmat ïa ka Indian Navy, KFA Southern Samity bad Services Football Team, da kaba jop nam lahduh ha ka Santosh Trophy bad ka Services ha u 2015 bad 2016.
Ha ka samoi ba bud, u Bhaskar u la leit ban ïalehkai noh ha ka I-League bad ka Minerva Punjab, ha kaba u la pynlut lai samoi bad mih madan ruh ha ka AFC Champions League Qualification stage bad ha ka AFC Cup ha u 2019. U la don bynta ruh bad ka Punjab ha ka jingkhur nam lahduh ha ka I-League.
U Bhaskar Roy u la ong, “Kadei ka sngi kaba khraw na bynta jong nga bad ïa ka ïing ka sem. Kadei ka jingtrei shitom dalade hi bad ka jingshah shitom ba ngan ïoh ban ïalehkai ha ki kyrdan kiba heh, bad ban mihkhmat ïa ki club kum ka Mumbai City kadei ka burom kaba khraw na bynta jong nga.
Nga dap da ka jingsngewnguh ïa ka club kaba la shanñiah bad ibit ïanga ban don lang bad ka kynhun. Nga da thrang ban pyni ïa ka lah bad ka lad ban ïatreilang ryngkat ki paralok kiba don sap ha ka kynhun. Kadei ka kabu ksiar kaba khraw tam na bynta jong nga bad nga la long ba la pynkhreh ban ai kaba paka tam na bynta ka kynhun.”
Na ka liang u Des Buckingham Head Coach ka Mumbai City FC u la ong, “U Bhaskar udei u rangap kol donsap bad hadien ba u la shah jied kum u ranap kol tbit tam ha ka I-League ha ka samoi ba lah dep nga la rai beit ban wanrah ïa u sha ka kynhun. Ka jingdon jong u kan nang pynkhlaiñ ïa ka kynhun ha ka liang ka ap kol. Nga da khmih lynti ban ïatreilang ryngkat ryngkat bad u Bhaskar na bynta ban poi sha ka thong kaba ngi la buh shakhmat.”
Kawei pat ka kynhun kaba dei ruh ka lahduh jong ka ISL ka Hyderabad FC ka la nang pynkhlaiñ ïa ka kynhun da kaba soi pura ïa u Soyal Joshy (right-back) ha ka kontrak ba lai snem.
Ha ka sngi Saitjaiñ ka club ka la pynbna ba u Soyal Joshy uba don bynta ha ka jingjop lahduh ha ka Santosh Trophy 2022 u la soi ïa ka kontrak ba lai snem kaban kut haduh ka samoi 2024-25.
“Ka long shisha ka khyllipmat kaba sngewtynnad tam ha ka jingïaid lynti jong nga ha ka kam ïalehkai pro-fessional ban pynïasoh sha ka kynhun lahduh kum ka Hyderabad FC,” ong u Soyal, hadien ba la dep soi ïa ka kontrak kaba thymmai bad katei ka club.
“Nga ai khublei ïa ki coach jong ka Hyderabad FC bad ki bor pynïaid kiba la shanñiah tylli ha nga bad nga da khmih lynti ban ïoh mih madan lang noh ryngkat bad ki paralok ha ka samoi pynkhreh,” la ong u Soyal.
U Soyal uba dei na Kerala, u la sdang ban ïalehkai ha ka academy jong ka Prodigy Sportz bad Don Bosco Football ha ka rta ba 11 snem. U la sdang ban kiew ha ka kam ïalehkai ha ki snem ba u don bad katei ka academy, da kaba mih madan ha kiba bun ki tournament ha ki kyrdan ïalehkai bapher bapher.
Utei u bak kamon, u la pynïasoh bad ka Golden Threads FC bad udei uwei na kiba hakhmat eh jong ka kynhun ha ka Kerala Premier League trophy 2021-22.
U la jop ruh ïa ka Santosh Trophy 2021-22 bad ka kynhun ïalehkai jong ka Kerala ha kaba udei uwei na kiba mih madan tista da ka jingdon jong u ïa ka sap ïalehkai ha ka rta ba dang khie samla.
U Soyal un ïoh ban mad nyngkong eh ha ka jingïalehkai ISL da kaba un mih madan bad katei ka lahduh, bad u la pynkhreh ban kilan met bad ka kynhun hapoh ka jingïalam u Manolo Marquez na bynta ka samoi ban wan 2022-23.
U Soyal ba dang 20 snem ka rta u dei uba lai u rangïalehkai napoh ka ri ba ka Hyderabad FC ka la soi hadien ba ka la dep ban soi ïa u Alex Saji bad Manoj Mohammad.
Ka FC Goa ruh ka la dep ban soi pura ïa u Ayush Chhetri u rangïalehkai pdeng dang khie ha ka kontrak ba lai snem kaban kut haduh u 2025.
“Ka FC Goa kadei kawei na ki club kaba biang tam hapoh ka ri bad nga dap da ka jingsngewkmen ban ïalehkai na kane ka club. Ban ïalehkai ha ka Indian Super League (ISL) kadei kawei ka jingphohsniew kaba khraw tam bad nga ai khublei ïa ka FC Goa kaba la ai hanga ïa kane ka kabu,” ong u Chhetri hadien ba la dep soi ïa ka kontrak.
“Ban long u midfielder, nga sngewtynnad bha ban ïoh pyllait bad pashat bol. Ka jingai ai mynsiem jong ka club ïa ki nongïalehkai football kum manga kadei kaba la khring bha na bynta jong nga. Haba nga la ïakren bad ki nongpynïaid, ki la pdiang sngewbha bad pynthikna ba nga dei uwei uba hakhmat eh na kaei kaba ki thmu. Dei kane ba nga khmih lynti ban nang jam shaphrang.
“Nga ieit ruh ïa ki nongkyrshan jong ka FC Goa. Nga la dep ïohi ba katno ki ai jingkyrshan met bad mynsiem ïa ka club bad ïa ki player, bad nga dap da ka jingsngewkmen kaba khraw ban long uwei ha kane ka kynhun. Nga kular ba ngan ai kaba bha tam na bynta ka kynhun, bad nga da kyrmen skhem ban sa ïoh ïakynduh noh shen ïa ki ha Fatorda,” la ong u Chhetri.
U Ravi Puskur, Director jong ka club u la pynpaw ka jingsngewkmen ban ïoh soi ïa u Ayush. “Ka club ka la soi ïa u Ayush ka shi bynta ka jingangnud jong ka club. Udei u player ba kynsai jong ka ri India ha kine ki snem ba lah leit noh bad ngi la pyrshang la slem ban wanrah ïa u sha ka club ha ka por kaba biang tam.”
U Chhetri ba dei na Mizoram, u la sdang ban ïalehkai football ha ka rta ba dang san snem. U la kiew ha ka kam ïalehkai football bad ïoh ban mih madan sien nyngkong eh ha kaba u la shah jied sha ka kynhun jong ki U-15 bad U-18 jong ka Aizawl FC ha ka Hero Youth League.
Ka jingtbit jong u ban ïalehkai ka la pynlong ïa ak Aizawl FC ban kynthup ïa u sha ka kynhun jong ki senior ha ka samoi 2021-22, bad u la ïoh ban mih madan ha ka I-League.
U Chhetri ba dang 19 snem ka rta u la mih madan 10 sien ïa ka Aizawl FC ha ka I-League 2021-22. Ha ka 1 tarik Ïaïong, utei u rangïalehkai pdeng u la thep kol ha ka jingïakhun pyrshah ïa ka Gokulam Kerala, bud pat sa ïa ka NEROCA FC bad Sudeva Delhi FC.