Chennai, Jylliew 4: Ka lahduh arsien jong ka Indian Super League (ISL) ka Chennaiyin FC ka la soi ïa u kapten ka Bengal u ba dei ruh u rangïalehkai dien u Monotosh Chakladar na bynta ka samoi ban wan.
U Chakladar udei u rangïalehkai ba lai ba ka Chennaiyin FC ka la soi mynta ka lyiur. Kadei ruh ka sien ba ar ha ka jingteh kontrak ha ka ISL na bynta utei u rangïalehkai ba dang 24 snem ka rta, uba ïalam ïa ka Bengal kum u kapten ha ka 75th Santosh Trophy kaba la long ha u bnai ba lah dep bad u la lah ban ïalehkai bad ba hakhmat eh na bynta ka team kaba la wan ba ar ha katei ka lympung.
“Baroh ngi dap da ka jingsngewkmen ban pdiang sngewbha ïa u Monotosh Chakladar sha ka Chennaiyin. Baroh na ngi kiba don ha ka club ngi la tip bha ïa ka jinglong ba tbit jong u kum u nongïalam bad ruh ki jingïalehkai ha ka Santosh Trophy bad ngi dap da ka jingsngewkmen ban ïoh wanrah ïa u ban ïasam lem ïa ki jingtbit jong u sha kiwei pat. Nga thikna ba un lah ban ïalehkai bha bad ban ïarap ïa ka kynhun ha baroh ki liang,” ong u Vita Dani uba dei u trai jong ka Chennaiyin.
U Monotosh uba la bna nam ha ka ïalehkai football ha ka jylli jong ka Bengal, un wanrah ka jingshemphang ha ka liang jong ka Chennaiyin, bad u la ïoh ruh ban mih ïalehkai ha kiba bun ki jingïakhun hapoh la ka jong ka ri ha kine ki san snem ki jingïaid lynti jong u ha ka kam ïalehkai football.
Dang shen u la don lang bad ka Gokulam Kerala bad East Bengal ha ka I-League bad mynta utei u rangïalehkai uba dei na Bandel u la khmih lynti ban ïoh mih madan na bynta ka Chennaiyin FC ha ka lympung ïalehkai league kaba hehduh hapoh ka ri.
“Nga dap da ka jingsngewkmen kaba khraw ban ïalehkai ha ka ISL kaba dei ruh ka sien kaba nyngkong bad na bynta kane ka kynhun ba la ïoh rah arsien ïa ka nam lahduh, ka Chennaiyin FC. Kaba nga don mynta ka long beit ba ngan trei shitom, ban don bynta ha ka kynhun ba nyngkong bad ban jop ïa ka nam lahduh ha kane ka kynhun,” ong u Chakladar.
U Chakladar u la sdang ban ïaid lynti ha ka kam ïalehkai football bad ka United Sporting Club kaba dei ka club na Kolkata shwa ba un leit ban ïalehkai na ka Mohammedan Sporting, ha kaba u la mih madan ha ar tylli ki Second Division I-League ha ka samoi 2017-18.
Ka jinglah jong u ban ïalehkai bha na bynta ka Pathachakra FC ha ka samoi 2018-19 ha ka Calcutta Premier Division ka la pynlong ïa u ban ïoh mih madan ha ka I-League ha katei ka samoi ha kaba u la pynïasoh sha ka Gokulam Kerala lyngba da ka ram. U la mih madan saw sien na bynta katei ka kynhun Malabarians bad hadien kane u la mih madan na bynta ka East Bengal ha ak samoi kaba bud jong ka I-League.
U Chakladar u la don bynta ruh bad ka Peerless SC da kaba khur nam lahduh ha ka Calcutta Football League ha u 2019.
