Ludhiana (Punjab), ïaïong 10: Ar tylli ki kol kiba sted kawei hadien kawei ha ka kylla miet na u Everbrightson Sana Mylliempdah (53’) bad u Ephraim Lalremtluanga (57’) ki la pynskhem ïa ka jingjop na ka bynta ka Shillong Lajong FC da 2-0 pyrshah ïa ka Namdhari FC ha ka Indian Football League (IFL) 2025-26 ha Namdhari Football Stadium ha Ludhiana hynne ka miet sngi Thohdieng.
Da kane ka jingjop, ka Shillong Lajong ka la kyntiew ïalade sha ka kyrdan ba lai ha ka miej da kaba kamai 14 poiñ na ki 8 tylli ki jingïakhun, katba ka Namdhari FC ka dang sah ha ka kyrdan kaba phra da kaba kamai 7 poiñ na ki 8 tylli ki jingïakhun.
U coach ka SLFC u Birendra Thapa, u la wanrah saw tylli ki jingkylla ha ka kynhun, da kaba aiti ïa u Ranit Sarkar ïa ka kam ap kol ba nyngkong mynta ka samoi ha ka jaka jong u Siwel Rymbai. U Kitboklang Khyriem u la mih ha ka jaka jong u Samuel Muansang kum u rangïalehkai ba shadien, u Abelson Jachi u la mih ha jaka jong u Gladdy Nelcen Kharbuli ha pdeng madan, bad u Ephraim Lalremtluanga ha ka jaka jong u Treimiki Lamurong.
Hadien ka jingïalehkai kaba khlem kol ha ka kylla step, ka Lajong kaba ïakhun jngai nala ïing ka la sdang ïa ka kylla miet ryngkat ka jingthmu kaba kham khlaiñ, ha kaba ka la ïoh ban lamkhmat ïa ka jingïalehkai ha ka minit kaba 53 lyngba u Everbrightson Sana.
Nangta u Everbrightson u la don bynta ban thawlad ïa ka kol kaba ar ha kaba ka Lajong ka la pynjlan ar shah ïa ka kol lamkhmat tang hadien 4 minit. Ka bol pashat kaba thikna na u Everbrightson ka la shem ïa u Ephraim, uba la mareh biang por sha ka bol shuwa ba un shim ïa ka rai ban khyrwit ïa ka shapoh kol. Na ka bynta ka jingïalehkai ba kyrpang, kynthup kawei ka kol ryngkat ka assist u Everbrightson u la shah jied kum u Player of The Match.
Hadien san tylli ki jingïalehkai shabar nala ïing, naduh ka 19 tarik u ïaïong, ka Lajong kan wanphai biang sha la ïing na ka bynta ka jingïakhun kaba khatduh jong ka Stage 1 ha kaba kan aireng pyrshah ïa ka Aizawl FC ha ka 18 tarik u ïaïong.
Lah ban kdew ba ka Shillong Lajong FC ka la lah ba kan ïalehkai bha ha baroh san tylli ki jingïalehkai kiba long shabar nala ïing, da kaba jop lai sien, ïakhaid shi sien bad shah rem shi sien.
