Indian Football League 2025-26: Naba ïakhaid mar shi point ïasam ka Lajong bad ka Rajasthan UnitedIndian Football League 2025-26: Naba ïakhaid mar shi point ïasam ka Lajong bad ka Rajasthan United

SHILLONG, Lber 02: Ka Shillong Lajong FC ka la sdang ïa ka lynti ïaid ha ka Indian Football League da kaba ïakhaid mar 1–1 kol bad ka Rajasthan United FC ha ka jingïalehkai kaba la long hala ïing ha SSA Stadium, Polo, kaba la long ha ka janmiet jong ka sngi U Blei.
Ryngkat ka jingkyrshan ba radbah na ki nongkyrshan hala ïing, ka Lajong ka la lah ban ïalehkai bha bad ñion ïa ka jingïalehkai naduh kaba sdang. Ka kynhun ka la ïoh ban pynshongshit ïa u paidbah da kaba pynkhihjar nyngkong lyngba u Everbrightson Sana Mylliempdah ha ka minit kaba 15, kaba pynlong ïa ka Lajong ban lamkhmat ïa ka jingïakhun ha ka kylla step.
Hynrei ka Rajasthan United FC ka la wanphai da kaba kham tyngeh ha ka kylla miet bad ka la lah ban pynïakhaid ha ka minit kaba 53 lyngba u Abhishek Ambekar, kaba la nang pynjur shuh shuh ïa ka jingïakhun hapdeng kine ki arliang mamla.
Watla ki la don katto katne ki lad bad ki jingpyrshang thep kol kiba paka, ka Lajong kam shym la lah satia ban pynkhihjar, kaba la pynthikna ïa baroh arliang ban ïasam mar shi point na kane ka jingïalehkai.
Haba kren hadien ba la kut ka jingïalehkai, u Head Coach u la ai khublei ïa ka jingpyrshang bad jinglong kaba ïaineh jong ki nongïalehkai, katba u la ai khublei ruh ïa ki nongkyrshan namar ba ki la leh ïa la ka jong ka bynta ban ai mynsiem ïa ka kynhun.
Mynta ka Shillong Lajong FC kan phai khmat sha ka jingïakhun kaban wan pyrshah ïa ka Real Kashmir FC ha ka 08 tarik u Lber ha ka por 6:30 janmiet ha SSA madan, Polo.