Imat ka sorkar kam pynbha shuh ïa surok NH-6 naduh Lumshnong shaduh Ratachera : KSU-NC

Khliehriat, Nohprah 12 : Ki dkhot jong ka Khasi Students Union Narpuh Circle ki la lap ba ka sorkar Assam ka la pyntrei shaid shaid ïa ka surok national highway ha ka thaiñ Assam kaba naduh jingkieng Malidor, Kalaiñ,Badarpur ter ter, ki la pynpaw da ka jingsngew khia haba phai pat sha ka jinglong jingman ka surok national highway ba jot rathai ha ka thaiñ Narpuh bad u Vice President jong ka KSU Narpuh Circle, u bah Phanuel Tongper u la ong ruh ba “imat kane ka sorkar Meghalaya pat kam don jingmut shuh ban shna pynbha ïa kane ka surok ha Narpuh kaba naduh Lumshnong ter ter shaduh Ratacherra” .
Na ka liang ka seng ka la kynthoh jur ba kane ka jingbym shim khia ka sorkar ban maramot pynbha ïa ka surok ka pynpaw shai ïa ka jingtlot kane ka sorkar MDA kaba hapoh ka jingïalam u Conrad Sangma kaba bun bha ki jingsah dien ha kiba bun ki liang “Haba sa tang khyndiat bnai ka aiom lyiur kan sa poi ngim tip shuh aiu kan jia ïa ki nongleit nongwan kiba ju ïaid lyngba na kane ka surok national highway-6 na Narpuh East Jaiñtia Hills District bad la sngewthuh ba kum kane ka jinglong ka surok kan nang ïai ktah beit ïa ka leit ka wan jong ki paidbah ym tang ïa ki briew jong ka thaiñ, hynrei wat ïa kito kiba na ka jylla Mizoram, Assam, Tripura, Manipur bad kiwei kiwei ki jylla ruh kiba ju ïaid na kane ka surok” ong u kyrwoh.
Ka seng ka kynthoh shuh shuh ruh ba lada ka surok kan nang ïai long sah kumne kan long ka jinglehraiñ kaba khraw ïa ka sorkar MDA