Imat ka NPP ka tip tangba ka ap ïa ka UDP ban leh : President MPCC

Shillong, Naitung 25 : U President ka Meghalaya Pradesh Congress Committee, Bah Vincent H Pala ha ka sngi Nyngkong u la kynnoh ba ka NPP khlem pep ka la tip halor katei ka jingjia kaba la pynkhihwin ïa ka jylla baroh kawei tangba ka ap ba ka UDP kan leh ïa kaba donkam.
Katei ka jingkren jong u heh Congress ha ka jylla kadei halor ka jingleit khynra jong ki pulit ïa ka farm house jong u MDC ka BJP ha Tura bad ruh halor ka jingkynthoh kaba la mih pat na ka BJP pyrshah ïa ka NPP.
“Ka NPP imat ka tieng bad salia ban leh ei ei namar ka BJP ruh ka don ha ka bor,” la bynrap biang u Bah Pala. Kumta u la ong ba mynta ka la dei pat sa ka BJP ban pynphai kylla ïa ka NPP bad UDP.
Shuh shuh u ong ruh ba ha kane ka sorkar synrop, ki ïohi mynta kumno ka Bharatiya Janata Party (BJP) ka khyrwit pyrshah ïa ka United Democratic Party (UDP) bad mar kylliang bad ka National People’s Party (NPP) ruh. U ong ruh ba kane ka pyni thamula ban ïohi ba dei ki party ba donlang ha ka sorkar synrop jong ka MDA kiba sdang mynta ban ïa thud kynroi shwa ka elekshon.
U Bah Pala u ong ruh ba kine ki party kiba don mynta ha ka sorkar MDA kim pyrkhat satia shaphang ki nonghikai lane ïa ka jingeh jong ki nongtrei ka koit ka khiah kiba la hap ban mih sha surok ban dawa ïa ka hok jong ki.
“Hynrei kaei kaba ki pyrkhat ka long beit tang ban ïa khyrwit para ma ki ha ka por elekshon. Nga ngeit ba dei tang ka Congress kaba dang pyrkhat mynta ïa ki nongshong shnong,” la bynrap biang u Ma Pala.
Lah ban kdew hangne ba ka jinghiar khynra jong ki pulit ïa ka farmhouse jong u MDC ka BJP ha Tura ka la wanrah ïa ka jingkynnoh kaba mar kylliang hapdeng kitei ki party kiba donlang ha ka sorkar.