SHILLONG, Rymphang 26: Ka Shillong Lajong Football Club kan sdang ïa ka samoi ïalehkai 2025-26 jong ka lympung Indian Football League (IFL) hala ïing pyrshah ïa ka Rajasthan United Football Club ha ka 01 tarik Lber, 2026 kaba hap ha kane ka sngi U Blei.
Kane ka jingïalehkai kan long ha SSA Stadium, ha ka por 6:30 baje janmiet.
Mynta ka samoi ka Lajong ka la pynbna ba kan sei madan tang da ki rangïalehkai trai ri khlem da kynthup ïa kiba nabar, ha kaba u Kenstar Kharshong un shimti ïa ka kyrdan kum u kapten, katba u Phrangki Buam kum u symbud kapten. Ka kynhun kan hap hapoh ka jingïalam jong u Birendra Thapa kum u Coach.
Haba kren ha ka jingïalang bad ki lad pathai khubor, ka SLFC ba la mihkhmat da u bah Seibor Sana Adviser ka klob, bah Habamutlang Lyngdoh – General Manager, ka la kyntu bad ïawer ïa ki riew paidbah ba kin ai ka jingkyrshan da kaba wan sakhi ïa katei ka jingïalehkai ka ban long ha kane ka sngi U Blei ban wan.
Haba kren halor ka rai jong ka kynhun ban sei madan tang da ki rangïalehkai trai ri, u General Manager ka SLFC u la pynpaw namar ba ka jinglut jingsep ka long kaba bun ka kynhun ka la rai ba kan nym soi rangïalehkai kiba nabar ri.
Na ka liang jong u Coach Birendra Thapa, u la ong, “Mynta u snem ka kynhun ka don ïa ki rangïalehkai kiba kynsai bad kiba la shemphang bha ïa ka I-League.”
Katkum ka thup prokram ba la pynbna da ka AIFF, ka IFL 2025-26 kan treikam da ka rukom lehkai Two-stage format. Ha ka Stage 1, ki 10 tylli ki kynhun kin ïakynduh pyrshah kawei ïa kawei tang mar shi sien (single-leg) la ka long shabar ne hala ïing. Nangta ha ka Stage 2, ki san tylli ki kynhun kiba pyndep ha khlieh duh kin ïakhun ha ka Championship Round katba ki san tylli kiwei pat kiba bud nadien kin hap ban ïakhun ïa ka Relegation Round.
Na ka bynta kane ka samoi ka SLFC kan ïoh ban ïakhun saw tylli ki jingïalehkai hala ïing bad san tylli ki jingïalehkai shabar ban pyndep ïa ka wat ïakhun jong ka Round Robin Stage.