Ïeng skhem ki longkmie ka shnong Tyrna ban ym lad satia ïa u drok ban rung ha ka shnong

Shillong, Naitung 19: Kum ka dak jingshim khia ban ïaleh katba lah ban kiar na kaei kaba la jia ha nongbah Shillong kaba la shah ktah bha ha ka jingwan lynshop jong kiba bun ki briew kiba la ngat bad kyrni ha ka jingpyndonkam ïa u drok, ka Seng Kynthei jong ka Tyrna Presbyterian Church ki la pynlong ïa ka jingai jinghikai pynsngewthuh halor ki jingsniew ba mih na u drok.
Na ka liang ka seng ka la leh ïa kane da kaba ïalap pynsngewthuh paidbah halor ka jingkyrni kiba drok bad ban kiar ruh na kane ka jingma kaba la wan tyllep khamtam ïa ki nongshong shnong ka nongbah Shillong.
Ka phang bad ka mat kaba kongsan halor ka jingpynlong ïa kane ka jingpynsngewthuh paidbah ka long ban long kiba la pynkhreh ha shwa ba u drok un ïoh ban rung hapoh ka shnong Tyrna kumba la jia bha hapoh ka Nongbah Shillong.
Ïa kane ka prokram la pynlong da kiba bun ki longkmie kiba la batai halor ki dak ki shin jong ka jingdih ïa u drok, ki daw ba la pynlong bad kumno ban shim ïa ki sienjam ki lad jingïada.
Ha kane ka sngi u Nongaiktien ka BJP Meghalaya u Bah M Kharkrang u la ïadonlang kum uba la shah khot sngewbha bad ha ka jingïalang bad jingïasyllok kaba lyngkot u la ai ka jingïaroh ïa ki longkmie kiba la ïohi jngai bad ba ki la ïeng skhem ban ym dei ban shah ïa u drok ba un wan rung hapoh ka shnong kaba itynnad ka jong ki.
Ïa kane ka prokram na ka liang ka Jingïaseng Kynthei Balang Presbyterian, Presbyterian Church of India ka la pynlong ïa kane ka kam ïalap ha ka sngi rakhe ïa ka Women’s Week & Women Sunday, ha kaba ka phang pdeng ka dei “Ka jingthew ka jingdap rynïeng U Khrist.”