Ka jingdawa ban pynkylla ïa ka AD Rule ha ri lum Garo kam dei kaba dang thymmai hynrei ka dei kaba la slem bah hynrei namar ba ki seng saiñ pyrthei ki tieng ïoh rem ha ka election kumta kim nud ban shim ïa kano kano ka rai ki shu ieh ba ka kam kan sahteng beit. Hynrei hadien ka jingshah thombor jong uwei u dkhot ka ACHIK u Dalseng Sangma kat haduh ba un duh noh ïa ka jingim ha Rajabala sdang jur ka jingïakynad pher jaidbynriew ha ri lum Garo.
Hadien ba kane ka jingkynad pher jaidbynriew na katei ka jingjia ka la pur kylleng ki jaka ka ri lum Garo bad hadien ba ka sorkar ka la pynbna ïa ka election MDC sha ka Garo Hills Autonomous District Council (GHADC) la mih ka jingdawa na ki seng bhalang bapher bapher kiba dawa ba ym dei ban ailad ïa ki bar jylla ban ïashim bynta ha ka election MDC namar kane ka dei beit thik tang ïa ki trai ri trai muluk. Namar ki Autonomous District Council (ADC) ki dei ki council ban peit bad ïada ïa ki trai ri trai muluk, ïa ki riti ki dustur jongki, ïa ka kolshor tynrai jongki bad ter ter.
Haba la poi ka sngi thep kyrteng uwei u MLA ba rim bad kiwei dei ki bar jylla ki la ïaleh pyrshah bad ki la leit ban thep kyrteng. Ha katei ka sngi ki la shah khanglad ban thep kyrteng bad kane ka jingkhang lad ka la pynlong ïa u ban kren pynshit jaidbynriew. Na kane ka daw sa jia ka jingkulmar kaba jur ha ri lum Garo kat haduh ban iap briew ruh. Hadien kane ka jingkulmar ka la jur bha ka sorkar ka la rai ban pynsangeh noh shwa ïa ka election MDC bad ha kajuh ka por ki MDC ki la wanrah ïa ka jingtynjuh bor ïa u CEM uba la hap ban hiar shuki noh shwa ka jingtynjuh bor bad ailad noh da uwei ban shimti kum u CEM ba thymmai.
Hadien ka jingshimti ïa ka shuki CEM bad thaw ïa ka EC kaba pura, la wanrah syndon ïa ka bill ban pynkylla noh ïa ka AD Rule kata ban khanglad ïa ki bym dei trai ri trai muluk ban ïoh shim bynta ha ka election MDC bad tang kito kiba don ka Syrnod ST kiba lah ban ïashim bynta. Na ka liang u Lat uba la ïohi ia ka jingkulmar kaba jur ha ri lum Garo kumta mar ïa poi ka bill u la soi pynskhem ïa ka ba kan long aiñ. Mynta la thikna ba ki bar jylla kin ym ïoh lad shuh ban ïashim bynta ha ka election MDC.
Hadien kane mynta sdang ban khih khoh reh sa ka KHADC bad JHADC namar katei ka kyndon kaba treikam ha ri lum Garo ruh ka don ha ka AD Rule jong kine ki ar tylli ki District Council. Tang kawei ka long ba hangne ki bar jylla ki khlem ïoh ban ïashim bynta naduh kaba sdang jongka election MDC namar ki nongïalam ba mynshwa kim ailad satia namar ki ADC ki dei beit tang ïa ki trai ri trai muluk. Hynrei wat la katta ruh ha kane ka juk stad mynta lada don ba kiew ïing lieh ïing saw halor katei ka kyndon ïoh lehse lashai la shisngi kiwei ki jaidbynriew ki ïoh ban ïashim bynta. Kumta namar kata ka daw mynta kine ki ar tylli ki ADC ruh ki la rai ban pynkhreh noh ban wanrah ka jingpynkylla ïa ka kyndon 128 jongka AD Rule khnang ban skhem ka aiñ ban ym don ba ïoh ban ïashim bynta ha ka election lait noh tang ki trai ri trai muluk. Na ka liang kine ki ar tylli ki Council ruh ki la dei ban pynsted noh ïa kane ka kam da kaba khot noh da ka Special Session ban ïakren ïatai tang halor kane ka aiñ ban ïoh soi pynskhem u Lat kumba u la leh ïa ka GHADC.
