Shillong, Jymmang 09: Mynta ka sngi ki nongïalam jong ka Federation of All School Teachers of Meghalaya (FASTOM) hapoh ka jingïalam jong u bah Mayborn Lyngdoh ki la leit ban ïeng ha khmat jong ka Meghalaya Secretariat ban ïa kynduh ïa u myntri rangbah ban sngewthuh ha kaba ïa dei bad ka jingdawa jong ki nonghikai.
Haba kren ha ki lad pathai khubor ha khmat ka secretariat u bah Mayborn la ong ba kila buh ïa ka jingthoh ha ka shitarik mynta u bnai ba ki kwah ban ïa kynduh ïa u myntri rangbah ka jylla hynrei haduh mynta ka sngi ruh kim pat ïoh ïa kynduh dei na kane ka daw ba ki sa ïeng ha khmat secretariat.
La ong ba lada u myntri rangbah um khot ïa kren kin pynlong biang ïa ka jingïakhih ha ka 12 tarik mynta u bnai bad da ong ba kin pynlong ïa ka jingïakhih shong kyllain mungor ha khmat secretariat lada kim ïoh jingbit ruh.
Kum ban pynkynmaw ba ka FASTOM kala dawa na ka sorkar ban pynkiew noh ïa ka tulop jong ki kyllum ia ki nonghikai Adhoc ha ka jylla bad ki la ïa kynduh ruh ïa ki ophisar ka tnad pule puthi jong ka sorkar jylla ban ïa kren ïa kine ki jingdawa ka jong ki.
