Shillong, Ïaiong 19 : Ka Synjuk ki Waheh Shnong ka Ri Jaiñtia ha ka sngi Ba-ar ki la leit ban kynduh ïa u Symbud Myntri Rangbah ka jylla, Bah Prestone Tynsong ban pyrshah halor ka jingthmu jong ka sorkar ban pyndait noh da ki smart meter ha ki iing ki sem kiba don ha rilum Jaiñtia.
Haba kren bad ki lad pathai khubor, u President ka Synjuk, Bah A Lipon u la ong ba ka jingpyrshah jong ki kadei ba hadien ba ki ïoh jingtip ba ka sorkar jylla ka thmu ban phah pyndait noh da ki smart meter khlem da don shwa ka jingpyn sngewthuh ïa ki paidbah.
“Ngi ïohi ba ka jingpyndait ïa kitei ki meter khlem da don ka jingpyn sngew paidbah kan ktah bad kan don ka jingeh ba ki paidbah kin mad namar hangi ki nongkyndong bun ki bym pat nang ban thoh ban pule khamtam lada ka bill jong kitei ki smart meter kan poi ha ki mobile phone,” la ong u Bah Lipon.
Kawei pat ka bynta kaba katei ka synjuk ka pyrshah ka long ba ïoh kitei ki smart meter kin ïaid jingkheiñ beit wat haba ym don bording khamtam ha ka por ba jur u slap ka lyer. “Ngi syier ïoh ka bai bording kan kiew bad kane kan ktah pat ïa u paidbah,” u la bynrap shuh shuh.
La ïathuh ba na ka liang u Symbud Myntri Rangbah u la kular ba un sa phah da ki briew jong ka tnad bording ban leit pynshai ïa ki paidbah ha ki shnong ki shnong ha shwa ban pyntreikam ïa kitei ki smart meter.
