Shillong, Risaw 19 : Ka kynhun jong ki seng bhalang ki la pynpaw ïa ka jingpyrshah kaba jur ïa ki kam tih dewïong kiba dang ïaid shakhmat ha Pharomgre, Chokpot, South Garo Hills, da kaba kdew ba kane ka jingleh kan ktah jur ïa ka mariang.
Kine ki kynhun ki kynthup naduh ka Garo Students’ Union (GSU), A·chik Holistic Awakening Movement (AHAM), A·chik Youth Welfare Organisation (AYWO), A·chik Conscious Holistic Integrated Krima (ACHIK), Federation of Khasi Jaintia and Garo People (FKJGP), Garo State Movement Committee (GSMC) bad ka Chokpot Area Vigilance Committee (CAVC), kiba la pynlong ïa ka jingleit jurip sha katei ka jaka ha ka 18tarik mynta u bnai.
Kane ka jaka tih marpoh khyndew ka don hajan katto katne ki wah ba kongsan, kynthup ïa ka wah Rompa, Rongdik, Khakiza, bad Rongma, kiba long ka jingim ba kongsan ïa ki paidbah ka Chokpot bad ki shnong ba marjan.
Kine ki seng ki la kynnoh ruh ba ka jingbteng tih marpohkhyndew ka la wanrah ïa ka jingjaboh kaba lah ban ïohi, ka jingkylla rong, bad ka jingtyrkhong jong ki wah rit, kaba buh jingma ïa ka mariang bad ïa ka jingim jong kito kiba shaniah ha ki.
Ha kajuh ka por ki la pynpaw ruh ïa ka jingsngewkhia bad jingsuba kaba jur ba ka jingtih kaba dang ïaid shakhmat ka lah ban ym dei tang ha ka jingtih dewïong, ryngkat bad ki dak kiba lah ban don ka jingwad bad tih uranium ha katei ka thaiñ.
Halor kane ki la kyntu ïa ka Sorkar Meghalaya ba ka dei ban pynshai ïa kane ka kam da kaba shai bad ban pynthikna ba ym don ba pynlong ne ailad ïa kum kine ki jait kam.
“Ngi kwah ruh ban pynpaw ïa ka jingsngewkhia bad jingsuba kaba jur ba ka jingtih mawshun kaba dang ïaid shakhmat ka lah ban ym long tang ha kaba tih dewïong. Da kaba pynshong nongrim ha ki jingkren paidbah bapher bapher kiba la pynpaw ha kaba sdang jong une u snem kynthup ïa kiba la pynpaw da u MP ba donburom u Saleng A. Sangma bad u Nongïalam ka Liang Pyrshah jong ka GHADC, u Bernard Marak ki lah ban don ki dak ba dang thmu ban wad uranium ha ki don katto katne ki bynta jong ka ri lum Garo.
Lada kum kine ki kam ki ïaid kum ka kam tih dewïong, kan wanrah ka jingma kaba khraw ïa ka koit ka khiah ym tang ïa ki nongshong shnong hynrei ïa ka thain Garo Hills baroh kawei. Ki jingma kiba ïadei bad ka jingtih uranium ki long kiba ma haduh katta katta bad ki lah ban pynjaboh ïa ka khyndew, ka lyer bad ka um haduh bun pateng. Kumta, ngi kyntu ïa ka Sorkar Meghalaya ban pynshai ïa kane ka kam da kaba shai bad ban pynthikna ba ym don kum kine ki kam ,” la pynpaw ki seng treimon sngewbha.
Kine ki seng ki la maham lypa ruh ba lada ka sorkar jylla kam tuklar mardor halor kane ka bynta kim banse ban ïaid da ka lynti la ka long da ka lynti ïakhih kaba jai jai bad da kiwei ki sienjam ban ïada ïa ka mariang, ki khlaw ki btap bad ki sawdong sawkun.
