ïeng pyrshah ki kali kamai ïa ka rai kamai Odd/Even jong ka sorkar ha nongbah Shillong

Shillong, Jylliew 02 : Ka kynhun jong ki kali kamai ba kynthup naduh ka East Khasi Hills Local Taxi Welfare Association (EKHLTWA) bad kumjuh ka Synjuk Ki Nongniah Taxi Sor bad Khapsor (SNTSK) ha ka sngi Thohdieng ki la ïeng pyrshah ïa ka hukum jong ki bor pynïaid Distrik ban pynïaid noh Odd/Even ïa ki kali kamai ha nongbah Shillong da ka thong ban weng ïa ka dheng kali ha ka nongbah.
Kitei ki ar tylli ki kynhun jong ki kali kamai, ki la kynduh ruh ia ka Deputy Commissioner ka Distrik, Kong RM Kurbah hynne ka sngi ryngkat ka jingkyrpad ban weng noh ïa katei ka jingbthah.
Kane ka jingkhihwin ki nongniah kali kamai ha ka nongbah kadei hadien ba ka la mih ka hukum kaba bthah ïa baroh ki kali kamai la ka long naduh ki bos saw SPTS, ki maxi cab bad ruh ki kali thoh ïong thohstem kiba ïaid na Kashari Point sha ki bynta jong ka Khyndailad. (Police Bazar) bad sha Motphran ba kin sdang noh ban ïaid Odd-Even noh naduh ka 05tarik u Jylliew.
Haba kren bad ki lad pathai khubor, u President ka EKHLTWA, Bah Wandonbok Jyrwa u la ong ha ka jingkynduh ïa ka DC kaba dei ruh ka Chairman jong ka Regional Transport Authority ki la pynpaw ba kim lah satia ban pdiang ïa katei ka hukum.
“Ngim lah satia ban pdiang ïa katei ka hukum namar ka Khyndailad bad Motphran ki dei ki jaka kamai kiba pdeng kiba heh bha ha ka thaiñ bad kumta lada khang ïa ki kali kamai ban ïaid na kitei ki ar tylli ki jaka kadei ka bym lah satia ban pdiang,” u la ong.
Shuh shuh u la ïathuh ba ka DC ka la pyntip ba kim lah shuh ban weng ïa katei ka hukum namar kadei kaba bthah da ka Meghalaya High Court. Kumta, u la ong ba kim sngewmyntoi shuh ban bteng ïa ka jingiakren.
U Bah Wandonbok u la ïathuh ruh ba ka Association ka la rai ban ujor noh sha ka Meghalaya High Court pyrshah ïa katei ka hukum kaba la ktah ïa ka kamai kajih jong ki kali kamai.
“Ka sorkar kadei ruh ban kynmaw ba ki taksi kamai ki la siew ïa ka khajna kaba heh bha bad kumta da kaba khang ban ïaid na kitei ki jaka ka pyni ba kim kheiñ briew ïa ki.”
Ha kajuh ka por, u la ong ba ka sorkar kadei ruh ban wad ïa ka daw tynrai jong ka dheng kali ha ka nongbah Shillong ym ban shu ong ba ki taksi ki dei ki daw ka dheng kali khamtam haba ki don bun bha ki kali shimet ruh kiba ïaid ha ka nongbah.
“Kumta, ngin sa kyrpad ïa ka Kashari ban pyntikna ba kan ym don kano kano ka jingle shilliang khmat ïa ki kali kamai,” u la ong.