Shillong, Ïaiong 06 : Ka Hynniewtrep Youth’ Council (HYC) ka la pynpaw ba kan ieng pyrshah ïa ka jingtyrwa kaba thmu ban kyntiew ïa ka bai klas jong ki samla pule ha ki college sorkar kiba don ha kylleng ka jylla Meghalaya.
Da kaba kynnoh ba kane ka jingthmu ka long kaba bym shong hok, ka Seng ha ka shithi sha u Myntri ka tnad Pule Puthi ka sorkar jylla Bah Lahkmen Rymbui, ka la ong ba kane ka sienjam kan nang bankhia shuh shuh ïa ka lyngkor jong ki samla pule kiba wan na ki nongkyndong bad khamtam kito kiba dei na ki longiing ba duna ka ïoh ka kot.
“Na ka liang ka Council ka dawa ba dei ban weng noh mardor ïa kane ka jingtyrwa, nangta ban kyntiew bad pynkhlain shuh shuh ïa ka jingkyrshan pisa ïa ki college bad khamtam eh ban pyllait biang por ïa ki scholarship bad ban syllok lang bad ki samla pule shwa ban wanrah kano kano ka jingkylla ha ka polisi treikam ,” ong ka shithi ba la phah da u samla Enlang Sawian Education Secretary HYC-CEC.
Ha shwa kane, ka seng ka ong ba ka jingdon ki college sorkar ka dei na ka bynta ban ai ka jingshakri kaba baroh ki lah ban kot bor na ka bynta kito kiba kwah ban bteng ïa ki jingpule kiba kham shalor. Kumta ka la pynpaw ba lada pynkiew noh ïa ka bai klas kan ym ïahap shuh bad ka nongrim treikam jong ka.
