Shillong, Rymphang 11 : U MLA barim ka West Shillong constituency, Bah Mohendro Rapsang ha ka sngi Balang u la resain noh na ka National People’s Party da kaba ong ba ka jingmih jong u na ka party ka dei na ki daw shimet.
Ha ka shithi resain kaba u phah sha u President ka NPP Meghalaya, u Bah Mohendro u la ong ruh ba u la resain na ka jinglong dkhot jong ka NPP naduh katei ka sngi hi halor ki daw shimet.
Tangba ha kajuh ka por pat u la pynpaw ka jingsngewnguh ïa ka party ba u la ïoh ban don bynta lang ha ka jingtreikam jong ka party ha kine ki saw snem.
“Nga sngewnguh ïa ka NPP kaba la ailad ïanga ban trei bad shakri ha kine ki saw snem. Nga sngew burom ruh ïa ka jingkyrshan bad ka jingtreilang kaba nga ïoh na ka party. Nga shim ruh kane ka kabu ban kitbok ïa ka NPP ba kan lah ban nang kiew arted ha ki kam jong ka ha ki por ban dang wan,” u la ong.
Kumban shu kdew hangne, u Bah Mohendro u la pynïasoh bad ka NPP ha shwa ka elekshon MLA ha u 2023 tangba u shah rem noh pat ha u Bah Paul Lyngdoh jong ka UDP.
