Iehnoh ïa ka kyntien ‘Ha ri la jong leh katba mon, hynrei donkam ban ïeng noh ha la ki kjat la jong: Adelbert

Shillong, Risaw 25: Ka Jaïaw Ehrngiew Transport Society (JETS) ha ka sngi Saitjaiñ ka la pynlait paidbah ïa ka Ambulance bad ki E-scooter, ha Jaïaw Lower Lansonalane ha kaba u MLA ka 17th North Shillong Constituency u Bah Adelbert Nongrum bad u MDC ka 19th Jaiaw Constituency u Bah Denzil Chen ki la long kongsan bad symbud kongsan, ki nongïalam shnong bad kiwei kiwei.
Ha shwa ban pynlait ïa kitei ki kali ki ban ai jingshakri ïa ki paidbah, u MLA kum u kongsan ula kyntu ïa ki samla ba kidei ban iehnoh ïa kato ka kyntien kaba ong, ‘Hari Lajong Leh Katba Mon, hynrei ban ong noh pat ba ha Ri La Jong dei ban ïeng noh ha la ki jong ki kjat’.
“Nga kwah ban khot ïa ki khun samla ba kin iehnoh ïa kato ka sur kaba ki ong ha ri la jong leh katba mon, hynrei ngi donkam pat ban ong ba ha ri la jong ngi donkam pat ban ïeng ha la ki jong ki kjat. Ka jingong jong ki katto katne ba ha ri la jong leh katba mon ka pynshlur ïa kiwei pat, namar baroh kum ki jingthaw nga ju ong kane ka kyntien ba ka la dei ka por ba ngin ïakren para jaitbynriew, hynrei ka don ruh ka por ba ngi hap ban ïakren ïa ka longbriew manbriew namar ngi don la ka jong ka hok bad ngim lah ban pynkheiñ ïa kata ka hok bad kum u briew shimet kumba nga la ong ba ngan ym ïapeiñ ïa la ka jong ka nongrim bad kumta nga hikai ruh ïa kiwei pat ki jaitbynriew ba kim dei ban sdang ban kyntur sha ki hok ka jaitbynriew jong ngi, namar lada ki kyntur sha ka hok jong ngi, kaba mut ka jingsuk kan ym don,” u la ong.
U la ong ruh ba da kine ki kyntien u kwah ban ai khublei kyrpang ïa ka JETS bad ryngkat ka 24×7 ba la ïohi ba ka kyntien jong ki, ka la long ryngkat bad ka kam ba ki la ai ka jingshakri kaba bha sha ki paidbah naba mynshwa ki kompeni ki wan nabar, hynrei mynta ki samla na la ka jong ka jylla ki la seng hi la ka jong ka kompeni.
Katba u MDC u Bah Denzil Chen u la ong ba ka Ambulance kadei kaba ai jingim ban ai jingsumar ïa ki thliew ïing bad dei ruh ban kynmaw ruh haba ïadei bad ka koit ka khiah la shem ba kan don beit ka jingñiew manla ki second bad ka jingslem ka por ka lah ban lam sha ka jingsngewsih ne kaba lah ïada ïa ka jingim.
“Ngi donkam ban pynbun shuh shuh ïa ki kali kit nongpang ha kane ka jylla jong ngi, lehse ha Shillong ki la don bun ki lad ki lynti ban lah ban poi kloi sha ka jaka sumar, hynrei sha ki thaiñ nongkyndong pat dang donkam bha kumta donkam ban kyntiew ïa ka jingdon jong ki kali kit nongpang,” ong u MDC.
Katba u President ka JETS bad Managing Director ka JETS 24×7 u Bah Pynskhemlang Uriah u la ïathuh ba hadien ba la ïohi ba ki lad ai kam sorkar ki la kut bad bun na ki samla ki ïaid khlem kam khlem jam, kumta la seng ïa kane ka kompeni bad dei ha u snem 2020 ba la lah ban pynïaid ïa ki kam da kaba seng bad ïeng hi ha la ki jong ki kjat.
“Ka jingpynlait ïa ka kali kit nongpang bad ki E-Scooter ka long ban ai ka jingshakri ïa ki paidbah bad khamtam ïa ki samla kiba khlem kam khlem jam bad khamtam kito kiba ka jingïoh ka long kaba duna ne low income ba lada ki donkam ban kamai Scooty ki lah ban pyndonkam da kine ki Scooter lada ki sngew ba ki shem jingeh ban thied hi la ki jong ki scooty,” ong u Bah Uriah da kaba bynrap ruh ban ai khublei ïa u MLA bad MDC kiba la ïadonlang ban ai ka jingkyrshan bad kumjuh ruh ïa kiwei pat kiba la wan pynshngaiñ.
Ha kane ka sngi la ïoh ka jingkren na ka seng samla jaiaw, nangta u Chairman ka Jaïaw Dorbar Pyllun, bad na ka liang u MLA bad MDC ki la pynlait ïa ka Ambulance bad ïa ki E-Scooter.