Jowai, Naitung 26: Ka lympung ïalehkai phutbol Independence Day Cub Under-17 Football Tournament 2023 bala pynïaid da ka West Jaiñtia District Sports Association (WJDSA) kaba la long hynne ka sngi Balang ha madan Kiang Nangbah Stadium, Dongmihsngi Jowai.
Haba phai sha ka jingïakhun kaba nyngkong ka Football Academy Meghalaya (FAM) kala pynliem da 3-0 kol ïa ka Salaroh, ïa kitei ki kol na ka FAM la thep da u Banchan Suchiang haka minit ba 9, u Jeri Messi Pohdweng haka minit ba 44 bad u Kamjuhi Phawa ha ka minit ba 49.
Katba ha ka jingïakhun kaba ar jong kane ka lympung U-17 ka Demthring kala pynliem da 1-0 kol ïa ka Catholic Youth, ïa katei ka shikol na ka Demthring la thep da u Dangkermi o Ryngkhlem ha ka minit ba 26.
Ka jingïakhun lashai ka sngi 27 tarik kan long hapdeng ka Evergreen Mukhla pyrshah ïa ka Panaliar haka por 1 baje shiteng nohphai sngi, katba ka Mulang Ialong kan ïakhun pyrshah ïa ka NSA haka por 3 baje nohphai sngi.
