Iathuh u Pastor da ka jingkthang mynsiem ïa ka jingshah thombor ki paidbah ha ki lehnoh na Assam

Khliehriat, Ïaïong 11: Ka MLA jong ka Sutnga Saipung Constituency, ka kong Santa Mary Shyllaha ka sngi Thohdieng ka la plie ïa ka Border Police Outpost ha shnong Mooriap, East Jaiñtia Hills District, ka shnong kaba ïa khappud bad ka jylla Assam ha kaba la sakhi lang da u Deputy Commissioner ka East Jaiñtia Hills District u Shivansh Awasthi, u MDC ka Sumer u Bah Krison Langstang, u Waheh Shnong Mooriap Bah Janki Pasleiñ, Waheh Shnong Lakaseiñ Bah Harling Salahe bad kiwei kiwei.
Haba kren kum ka kongsan, ka kong Santa Mary Shylla, ka la ai ka jing kitbok kitrwiang ïa ki nongïalam shnong jong ka shnong Mooriap bad ki shnong ba don ha Sumer elaka bad kyntu ïa ki ba kin sngewbha ban peit bha ïa ki shnong ki thaw na ka bynta ka bha ka miat, ka suk ka saiñ ha ka imlang ka sahlang bad ong ruh ba lada don kano kano ka jingjia ka bym sngewtynnad lane don ka jingsngew bym sngew shngaiñ ki dei ban pyntip sha ki pulit kiba don hajan lane ban phone sha ka kum ka nongmihkhmat.
Ka la ïathuh ruh ba ki la don bun bha ki kam pynroi kiba ka sorkar ka la iarap ban kyntiew ïa ka thaiñ ha kaba mynta ruh ka sorkar ka dang khot tender na ka bynta ban shna bha noh ïa ka jingkieng Bri Manar kaba ka mang tyngka kaba kot haduh T.14 klur tam kaba yn sa pyntrei noh shen, ha kaba ïadei bad ka surok ha Mooraiap pat ka kongsan ka kyntu ïa ki paidbah ba kin sngewbha iashah bad ap shipor namar kan nym lah ban leh ïa ki bun tylli ki kam ha kajuh ka por.
U Deputy Commissioner ka East Jaiñtia Hills District, u Shivansh Awasthi, IAS u la ai khublei ïa ka sorkar ba lam khmat da u myntri rangbah, u Conrad Sangma uba sngewthuh ïa ka jingdonkam ka tnat pulit, u la ong bad kular ruh ba lada don kano kano kaba donkam na ka liang ki bor synshar district ruh u long la kloi ban ai ka jingïatreilang “ngi tip ba kane ka Outpost ha khappud ka dei kaba donkam bha kumta nga kyrmen ki briew kim donkam shuh ban leit sha jngai lada don kino kino ki kam kiba donkam jingiarap na ki pulit”.
Ha kaba ïadei bad ka jingkyrpad u MDC ka thaiñ ban pynlong ïa ki awareness prokram ha ka thaiñ, u Deputy Commissioner u la ong ba dang shen hi u dang dep ban shong jingïalang bad ka tnat ba dei peit ïa ki khynnah bad ka jingeh ka long ba ki bor district bad ki bor pulit bunsien hi kim ju ioh pdiang ïa ki jingujor ne jingpyntip ha kaba ïadei bad ka shongkha khynnah hynrei watla katta ruh ki bor district ki wad jingtip hi na ki tnat treikam kum na ki Block ophis bad na ki ki pulit bad u la kular ban un sa pynlong ia ka awareness prokram ha kaba iadei bad ka shongkha khynnah bad kumjuh ruh ha kaba ïadei bad u drok.
U Superintendent of Police ka East Jaiñtia Hills District, u Giri Prasad u la ong “Nga sngew ba ka jingdon kane ka outpost ka ai ka jingiada ïa ki paidbah ka thaiñ bad ban don ka jingiadei bad ki pulit ka long kaba donkam ban pyntikna ïa ka shongsuk shongsaiñ ha ka imlang ka sahlang” u la ai khublei ïa ka MLA kaba la wan plie ïa kane ka outpost bad ong ruh ba dei ma ka kaba ju kyntu barabor ba donkam ban plie noh ïa kane ka outpost ka ban treikam pura namar ki shnong ha kane ka thaiñ ki jngai bha ban leit shaduh Headquarter, u la kular ban buh 12 haduh 13 ngut ki pulit battalion ha kane ka outpost lem bad u Sub Inspector u bah Seibor Sympli u ban peit bad Incharge ïa kane ka outpost, ha kajuh ka por u Giri Prasad u la ai khublei ruh ïa ka D.G.P, ka kong I.Nongrang, IPS, kaba la iarap ha kaba pynllait ïa ka mang tyngka na ka bynta kane ka outpost.
U Pastor J.Pasleiñ, haba kren shaphang ka mynnor ba la leit halor ka jingkynduh jingeh ki paidbah ka shnong Mooriap bad ki shnong ba marjan, u pastor u la pynpaw da ka dap ka mynsiem bad jingsngewsih bad jingsngew kthang namar ka jingshah thombor ha ki briew runar kiba dei ki lehnoh kiba na Assam, kaba la jia ha ka 13 tarik u bnai ïaiong 2005 kaba la buh jingsyier ïa ki paidbah ka thaiñ ha kaba kita ki runar ki la thombor bad batbor ruh ïa ki kynthei, ki la shoh la dat ïa ki briew jong ka thaiñ bad kumta baroh ki nongïalam shnong jong katei ka thaiñ naduh katei ka por hi ki la sdang ïa ka jingiaid lynti jong ki ban wad ki lad jingiada da kaba ki la kyntu bad dawa ba donkam ban don noh da ka police outpost ha shnong Mooriap, u la ong ruh ba ha u snem 2005 ka sorkar ka la buh ïa ki pulit battalion ha Umkyrpong bad tang hadien lai snem ka sorkar ka la rah noh ïa ki pulit na Umkyrpong bad ha u snem 2011 ki lehnoh kiba na Assam ki la wan pyndik biang ïa ki nongshong shnong ka thaiñ bad ha kane ka snem ki khlem ioh than ban thombor haduh katta katta namar da ka jingkheiñduh ki nongshong shnong ki la ia tur pyrshah bad rah da ki dieng bad iakhun pyrshah ïa kita ki lehnoh ha kaba ki nongshong shnong ki la ioh kem ïa uwei na kita ki lehnoh ha utei u snem 2011, u pastor u la ai khublei ïa ka sorkar kaba la buh ïa kane ka Border Police Outpost ka ban treikam pura na Mooriap ka ban ai ka jingsakri ïa ki paidbah jong ka shnong Mooriap bad ia ki shnong ba marjan kiba don ha kane ka thaiñ.
Kiba la ai jingkren ki kynthup ruh u MDC, u bah Krison Langstang, Waheh Shnong Lakaseiñ, u bah Harling Salahe bad kiwei kiwei, ïa ka prokram la pyniaid da u Additional Superintendent of Police, u bah S.Pasleiñ.
La pynsngew ruh da u Additional Superintendent of Police Bah S.Paslein ïa ki shnong kiba hap hapoh kane ka Border Police Outpost kiba kynthup ka shnong Mooriap, ka shnong, Umkyrpong, Lakaseiñ, Samasi, Mynthlu, Krem Myrsiang, Pala, Larket, Mynthning, Shyrwang, Khahnar, Muknor, Kseh, Mukhaiñ, Jalaphet Sumer, Tympiahkasu, Myntriang, Khlootynring bad ka Madan Pohkseh.