Ïathuh u CM ïa ki jingïaid lynti ha ka jingneh ka sorkar, ka roi ka san bad kiwei pat ki kam

Shillong, Laber 28: U Myntri Rangbah ka jylla u Conrad K Sangma, ha ka sngi saitjaiñ haba kren ha ka jingïalang jong ka jinglah ban pyndep jong ka sorkar Meghalaya Democratic Alliance (MDA) ïa ka jingdap 8 snem u la batai halor ki jingkylla jong ka jylla ki jingïaid lynti hapdeng ki jingeh, ka jingïaineh bad ki jingkiew ha ka roi ka san bad ïa kane ka prokram la pynlong ha SRGT Football Ground, Shillong.
Ha kane ka sngi la donlang u Myntri ka tnat Jngohkai, Agriculture & Farmers’ Welfare, u T D Shira bad u MLA, Umsning bad Chief Whip ka sorkar jylla u Dr C Lyngdoh nalor ki heh ophisar jong ka sorkar bad kiba ïoh jingmyntoi napoh ki distrik Khasi bad Jaiñtia.
Haba kren ha kane ka jingïalang, u Myntri Rangbah u la ïathuh ïa ki jingïohi jngai jong ka sorkar kaba wanrah barabor ïa ka jingkylla ïa ka jylla bad ka jingïapher kaba don jingmut ha ki jingim jong ki nongshong shnong bad bynrap ba ha kine ki 8 snem kiba la leit ka Meghalaya ka la ïaid lyngba ki jingeh bad ki rai kiba don jingmut.
“Mynta kumba ngi phai dien ngi ïohi ïa baroh ki jingïaleh bad ki lad kiba ngi la ïohpdiang. Da ka jingkyrshan jong ki briew kiba don jingmut ban ïarap ngi la lah ban thaw ïa ki lynti kiba kongsan ban pynïaid shakhmat ïa ka jylla,” u la ong.
U Myntri Rangbah u la banjur ba katba ka jylla kam kwah ban kam ba ka la ïohpdiang ïa baroh, ka la buh ïa ka jingkdew lynti kaba shai na ka bynta ka lawei. U la ong ba kane ka jingkiew shaphrang kam dei ka jingmih jong uno uno u riew shimet hynrei ka dei ka kam jong baroh bad ka jingngeit jong ki nongshong shnong ha ki nongïalam.
“Ki jingpynlut kiba kongsan ki la jam ïa ka bynta da ka jingsdang jong ki 1,576 tylli ki project kiba la sdang ha thaiñ jong ki Khasi bad malu mala T. 21,000 klur ki project ha Jaiñtia Hills region. Ki kam kiba heh ki dei ki kam pynroi ha ki surok, ki jingtei ha ki kam jngohkai, bad ka jingpynbha ïa ka New Shillong,” u la pyntip.
U la ong, “Hapoh ka PRIME programme, kumba T. 32.7 klur la dep ban sam la palat 5 snem. Ka homestay sector ka la ïohpdiang T. 136 klur ban kyntiew ïa ki kam jngohkai bad ki jingkiew ki nongshong shnong ha ka kamai kajih, katba T. 40 klur ka pynlut ban kyntiew ïa ki kam music.”
U la pyntip ba ka kam pynneh pynsah ïa ka sawdong sawkun ka dei ka kam kaba hakhmat da kaba mang T. 120 klur hapoh ka Green Meghalaya initiatives ban kyrshan ïa ki shnong ban pynneh pynsah ïa ki khlaw.
Haba kren shaphang ki jingkylla ha ka pule puthi u la ong ba la jan 1 lak ngut ki samla pule ki la ïoh jingmyntoi na ka Chief Minister’s Scholarships, kiba la ïohpdiang T. 6,000 marwei marwei, kaba la kot sha ka T. 60 klur bad da ka CM Elevate programme kaba kyrshan kaba kot sha ka T. 146 klur ha ryngkat bad ka T. 56 klur hapoh ka LIFCOM kaba pynïoh ka pisa ban trei ïa ki nongrep kiba rit bad ki seng bad kumba T. 50 klur hapoh ka kam rep syntiew kaba ka jinglut ka la long kumba T. 500 klur ka jingpynlut ha ki skhim pynroi kaba ai jingmyntoi ïa ki nongrep, ki samla bad ki kynhun bapher bapher.
U Myntri Rangbah u la pynkut da kaba pynskhem ïa ka jingkitkhlieh jong ka sorkar ban bteng ban trei da ka jingshim ka rai ka ban ïalam da ka jingïohi kaba shai bad ka jinglum lang lyngba ki jingangnud jong ki paidbah ka jylla Meghalaya.
U Myntri Rangbah bad ki heh ki haiñ ki la sam ïa ki cheque kumba T. 6.04 klur hapoh ka FOCUS+, ba la sam kumba 1.05 lak ngut kiba rim bad ki nongïoh jingmyntoi kiba thymmai, ka Green Meghalaya+ T. 24.54 klur ki cheque bad ki work order hapoh ka CM Elevate kaba long T. 76 lak na ka bynta kiba sengkam lajong da T. 18.47 klur ha ka jinglut na ka bynta ki 55 ki warehouse bad 4 tylli ki CFC, LIFCOM T. 27 klur sha ki 627 ki cooperative, MegLife T. 30 klur na ka bynta ki 128 tylli ki Community Hall bad hapoh ka Floriculture T. 22 klur sha ki 320 ngut ki nongïoh jingmyntoi kiba thymmai ha kaba baroh ki poi 789 tylli kiba ïoh jingmyntoi.
U Myntri Rangbah u la pynkup burom ïa ki nongïalam jong ki 37 tylli ki shnong ba la ithuh ïa ki kam ba ki trei hapoh ka Green Meghalaya program. Kumba 128 tylli ki Community Hall hapoh ka MegLife ba la kyrshan da ka JICA bad 34 tylli ki Warehouse & Common Facility Centre hapoh ka CM Elevate ba la plie da u Myntri Rangbah ha ka prokram.