Shillong, Nailur, 04: U nongïalam ka BJP u Bah Alexander L. Hek uba long ruh u Myntri ka Sorkar Jylla u la ïathuh lypa ba ka BJP kan jop 20-30 Seat ha ka elekshon sha ka Iiingdorbar Thawaiñ ka ban sa long ha u snem 2028.
“Ngi don ka lad ban jop haduh 20-30 tylli ki seat ha ka elekshon ban sa wan sha ka Ïingdorbar Thawaiñ,” ong u Bah Hek ha ki lad pathai khubor ha ka sngi Palei.
Hynrei u la pynpaw ba ka jinglong jingman ha Meghalaya, ka rai ka shong eh ha ka jinglong bad ki kam jong u kyrtong, ym tang ha ka jingkhlaiñ jong ka party.
U Bah Hek u la kyntait ruh ïa ki jingsngewkhia halor ka jingbym don ki kyrtong kiba tbit ban pynïasoh sha ka BJP, da kaba ong, “kumno phin ong ba ki kyrtong kiba bit kim rung sha ka BJP? Kum u Bah T.H Rangad, u la long u kyrtong uba biang tam jong ka BJP. Ngi pdiang sngewbha ïa baroh. Ka por kan sa long ka nongpynkhiah bad ka por hi kan sa batai ïa ngi.”
Halor ka elekshon GHADC ka ban sa long, u Bah Hek u la pynpaw ïa ka jingsngew skhem ba ka jingtrei jong ka party na ka bynta ki paidbah kan ïoh ïa ka jingshaniah na ki.
U Hek u la ong ruh ba ka jingtrei jong ka party ha baroh shisnem ka long kaba kongsan bha ban pynkhlaiñ ïa ka jingdon jong ka.
“Ka BJP ka dei kawei na ki seng saiñpyrthei kaba trei 24 kynta,” ong u Bah Hek, da kaba pynpaw ïa ka jingaiti jong ka party ban ïakynduh bad ki paidbah bad ban trei na ka bynta ka bha ka miat jong ki.
U Hek u la kam ba baroh ki seng saiñpyrthei ki ïakynduh jingeh ban ïoh ïa ka jingkyrshan na ki paidbah. “Kam dei ka kam kaba suk ban ïoh ïa ka jingkyrshan na ki paidbah,” u la ong haba pynskhem ïa ka jingdonkam ban ïai bteng ban ïatreilang bad ki paidbah.
Ha kaba ïadei bad ki jingshah thombor ki Khristan dang shen, u Bah Hek u la pynshai ba ki don ki kynhun kiba lah ban donkti, hynrei ha ka Social Media bunsien la shu teipop ïa ka BJP.
“Lada phi kylli ïa nga kum u riew saiñpyrthei, ka long namarba kam dei kaba la leh beit beit da ka BJP, balei kan ktah ïa ka BJP, lada ka BJP kam shym la leh eiei kaba bakla ïa kano kano ka jaitbynriew ne kano kano ka kynhun Khristan, Hindu, Muslim ne kano kano ka jingngeit, lada ka BJP ka donkti beit, kumta ngan ong ïa phi haoid kan ktah ïa ka party.”
Haba kylli, u Bah Hek u la kam ïa ka jinglong jong ka saiñpyrthei, da kaba pynpaw ba baroh ki party ki don la ka bynta lajong ban ïoh shim kabu.
“Ngim lah ban kyntait ïa ka jingshisha ba baroh ki seng saiñ pyrthei ki trei la ka jong ka bynta,” la ong u Bah Hek. Haba kaba pynpaw ba ka BJP kam dei duna bor, u la ong, “teng teng ka BJP ruh ka don ïa la ka jong ka kabu pyrshah ïa kiwei pat ki seng saiñpyrthei, kumta kiwei pat ki seng ruh ki don la ka jong ka kabu ïa ka BJP.”
Ha kaba ïadei bad u MDC jong ka BJP na Tura u Bernard N Marak uba pan jingïarap na ki nongïalam kiba nabar ka jylla, u Bah Hek u la ong ba um ïohi ba kan don ka jingleh bakla halor kata
“Kam don jingbakla ban pan jingïarap na uno uno u briew,” u la ong bad bynrap ba ka jingwad jingïarap ka dei ka bynta kaba thikna jong ka saiñpyrthei.
