Ïathuh lem ïa kita ki 5 lak tylli ki kam ba la kular ïa ki samla, kyntu u Bernard ïa u Conrad

Shillong, Nailur 29: U Nongïalam ka BJP bad u MDC ka Tura u Bernard N Marak u la kyntu ïa ka sorkar jylla ba la ïalam da u Conrad K Sangma ban ïathuh shaphang ki sienjam ban pyndep ïa ki jingkular kaba ka la khlei ha ka por elekshon ban pynïoh kam ïa ki samla bad ïa ki paidbah ka jylla haduh palat 5 lak ngut.
Ha ka shithi ba la phah sha u Myntri Rangbah ha ka sngi U Blei, u Marak u la ong, “Nga kwah ban kyntu ïa ka sorkar jong phi halor ki sienjam ba la shim ban pynurlong ïa ki jingdawa ba phi la kular ha ka por elekshon ban pynïoh kam ïa ki samla haduh 5,00,000 lak ngut.”
“Ka jingpynthikna jong phi ïa ki samla ba lada ki pynjop biang, kum u Myntri Rangbah ka jylla phin pynïohkam haduh 500000 lak ngut ki samla. Baroh ngi ngeit ba kum u Myntri Rangbah kan long kaba lah ban pynïoh kam ïa ki samla haduh 500000 lak ngut kiba dei ruh ki kam kiba neh shyrta naba mynta phi la ïoh ka jingbun paid,” u la ong.
U Marak u la ong ba dei halor kane ba ki samla ki la ai ïa ka vote ba kordor sha ka seng NPP da ka jingkhmih lynti bad kyrmen, hynrei imat kane ka long pynban ka jingbabe hapdeng ki samla, khamtam ki samla pule kiba la pule ha ki kyrdan kiba shalor kiba la shah ïeh noh khlem kam khlem jam bad ka jingïakhun jong ki ban ïoh ka jingim kaba bha, ka la long kum ka jingbym kut shuh pyrshah ïa kito kiba riewspah bad kiba don ha ka bor.
U la ong ba dangshen ka la don ka jingjied na ka bynta ki kam nurse, home guard bad kiwei ki kam hynrei imat ka don ka jingbym shai bym khuid ha ka rukom jied ha kaba katto katne ki samla ki pynpaw ka jingsngewkhia.
“Nga kyrpad ba kum kane, kam dei ban jia ha kane ka jylla kristan jong ngi. Nga kwah ban ai jingmut ba ka kam jied ïa ki kam ba ka dei ban long kaba khuid khnang ba kan ym don ka jingleh shilliang ïa ka hok ki kyrtong bad ba kam dei ban don ka jingleh bym hok ïa ki samla kiba dei hok ban ïoh ïa ki kam sorkar. Nga la ïohpdiang ïa ki jingujor bad ki jingeh na kito kiba applai naba ki tieng ba ïoh ka don ka jingleh shilliang hangno hangno,” ong u Marak da kaba bynrap, “Nalor kito kiba dang applai mynta, wat kito kiba la shah thung kam ruh ki la pynpaw ïa ki jingsheptieng. Kito kiba la shah thung kum ki nongtrei ASHA, AGANWADI, MSSAT, ki nonghikai Adhoc bad nonghikai sorkar, ki Health workers (ha Civil hospital, CHC, PHC, HC), ki Muster roll kiba trei ha kiba bun ki tnat, ki Home guard, ki nongshetja sngi (mid day meal cook) bad kiwei ki la ïaibteng ba ïa ki jingsiew jong ki khlem lah ban shim khia da ka sorkar jong phi. Ki ASHA kiba dei ban ïoh ka jingsiew kumba T. 2000 haduh T. 3000 kumba phi la ïalap elekshon, hynrei haduh mynta ki sah khlem da don kiba shimkhia. Ki nongtrei ANGANWADI kim pat ïoh ïa ki jingsiew jong ki, kumba la kular da ki ophisar. Bun na kito kiba la shah hikai hapoh ka MSSAT ki la shah wengnoh kam. Ka jingangnud ba kin ïoh noh ïa ki jingsiew haduh mynta ka la shu sah tang ha ki jingphoh sniew.”
U la kyntu ïa u Myntri Rangbah ban shim khia ïa kine jingeh khnang ba kiba duk bad kiba tlot kin ym shah ïehbeiñ.
“Lada don kano kano ka jingïarap ka donkam na ka liang jong ngi ban pynshisha ïa kine ki kam ba la kdew hangne bad ban ïaid shakhmat kum ka jylla kaba ueng ha la ka jingshaniah bad ban pynbna sarong ïa ka jylla jong ngi hapoh ka Viksit Bharat, ngi long kiba kwah shisha ban ïarap ïaphi ïa ki jingthmu jong phi ban thaw haduh 500000 lak tylli ki kam na ka bynta ki samla jong ka jylla ba kan wanrah ka jingkylla ha ka jylla.” ong u Marak ha ka shithi.