Ïathir ki tnat syntiat bad bor pahara ban tehlakam ïa ki kam khaïi tuh ha khappud Indo-Bangla

Shillong, Risaw, 30: Ki tnat syntiat jong ka Sorkar ki la ïakynduh lang ha ka sngi Balang ha ka jingïalang jong ka Directional Level Lead Intelligence Agency kaba la long ha ka ktem sah jong ki shipai BSF ha Frontier Headquarter, Meghalaya.
Ha kane ka jingïalang kaba hynriew phew hynriew jong ki tnat syntiat bahakhmat la pynïaid da u DIG (PSO) u Sh. I.D. Singh.
Ha ka jingïalang la ïathir ïatai kumno ban pynkhlaiï ïa ka jingïatreilang hapdeng ki tnad na ka bynta ban khanglad bad ban ïada ïa ka khappud jong ka ri India bad Bangladesh.
La ïakren ïa ki jingeh bapher bapher kiba ïadei bad ki kam khappud, da kaba pyrkhat kyrpang ïa ki jingeh kiba dang ïaid shakhmat kiba ïadei bad ki jingkhaïi tuh ïa ka shini bad ïa ki masi.
Ki nongmihkhmat na ki tnad syntiat bad na ki bor pahara bapher bapher ki la ïasam jingtip bad ki la thaw ïa ki lad ki lynti ban ïakhun pyrshah ïa kine ki kam be-aiñ kiba ktah ïa ka jingïada bad ïa ka ïoh ka kot jong ka ri.
Ki jingïakren ki kynthup ruh kumno ban pynkhlaiï ïa ki lad jingïada ha khappud.
U I.D Singh haba kren ha ka jingïalang u la pynpaw ba ka donkam ïa ka jingïatreilang hapdeng ki tnad ban ïada ïa ka khappud bad ban ïaleh pyrshah ïa ki kam runar ruser. Ki tnad bapher bapher ki la kular ban pynkhlaiñ ïa ka jingïasam jingtip bad ka jingïatreilang ban tehlakam ïa ki kam be-aiñ ha khappud.
Kane ka jingïalang ban pan ka jingïatreilang ka pyni ïa ka jingaiti jong ki BSF bad ki tnad syntiat ban pynneh ïa ka jingshngaiñ jong ka ri bad ban ïaleh pyrshah ïa ki jingma kiba mih ha shilynter ka khappud.