Mawkyrwat, Ïaïong, 27: Ka Sngap Syiem College Mawkyrwat (SSCM) ka la pynlong ïa ka Consultation Meeting halor ka (CUET) Central University Entrance Test UG 2022 ha ka 23 tarik u Ïaïong, 2022 ha kaba 18 ngut ki Principal jong ki Higher Secondary School ka South West Khasi Hills District ki la wan ïashimbynta da ka jingsngewkhia na ka bynta ki khynnah ki ban ïaleh ïa kane ka ne Entrance Test.
Ïa ka jingïalang la pyniaid ïa ka meeting da u Dr. K.K. Nongsiej, Principal jong ka Sngap Syiem College Mawkyrwat uba la kren lamphang ïa ka jingdonkam kyrkieh jong kane ka ‘Test’ khnang ba ki khynnah kin ïoh leit kolej ha une u snem hi.
I Resource Person, kong Dr. B. Marweiñ i la pynshai ba lada ki khynnah kim ïaleh ïa kane ka test kim ym lah da lei lei ban ïoh rung klas ha ki jaka pule ki College, kiba hap hapoh ki 44 tylli ki Central University ha India bad kumjuh ruh ki dei ban nang ban jied ïa ki subjek katkum ka jingkwah ki University lyngba ki kolej jong ki.
Halor kane ka jingïalang da kawei ka jingmut ka la ïa kut ban kyrpad ïa ki bor ba ha jrong la ka long ïa ki Central University ne Sorkar Jylla Meghalaya bad ka MBOSE ba kin plie noh kloi ïa ki Coaching Centre hapoh ka distrik ban ïarap ïa ki khynnah ym tang ïa kane ka Test hynrei ïa kiwei pat ki Entrance Test.
Lyngba kane ka jingïalang la ai jingmut ruh ba ïa ka subjek Computer dei ban pynlong noh kum ka Compulsory subjek ha ki skul ym shuh tang kum ka Optional Subject kumba mynshwa, shuh shuh ka jingïalang ka buh ka jingkyrpad ban pynthymmai noh ïa ka Syllabus jong ka, khamtam ki Arts Stream ba kan ïa ryngkat rynïeng bad ka syllabus ka NCERT.
Ha kane ka sngi baroh ki Principal ki la kular ban shim jingkitkhlieh pura ban ïalam ïa la ki jong ki khynnah ha ka ban jied ïa ki subjek na ka bynta kane ka Entrance Test bad ban ïarap ïa ki na ka bynta ban kin register ïa lade.
