Ïathir jingmut lang ki nongïalam ka Congress ha sor Jowai ban pynkhlain ïa ka Party

Jowai, Ïaïong 13: Ka District Congress Committee (DCC) Jaiñtia Hills District mynta ka sngi kala lum ïa ka jingïalang ban ïatai sani bha halor ki mat treikam bad ban pynkhlaiñ shuh shuh ïa ka Party hapoh ka West bad ka East Jaiñtia Hills District, ïa ka jingïalang la pynlong ha ophis treikam ka Party ha Caroline Ladthadlaboh Jowai.
Ha kane ka sngi ki nongïalam ba hakhmat jong ka Party naduh naduh u Secretary ka Meghalaya Pradesh Congress Committee (MPCC) ma Erwin K Syiem Sutnga, u ma Nehemayah Tyngkan Vice President MPCC, ma Rikut N Parien Secretary DCC, West Jaiñtia Hills District, MDC ma A.A Shullai, ki dkhot ka Youth Congress Meghalaya naduh u President jong ka u samla Adrian L C Mylliem lem bad kiwei de kiba la poi sha kane ka jingïalang.
Hadien jong kane ka jingïalang na ka liang u ma Erwin K Syiem Sutnga haba kren sha ki lad pathai khubor ula pynsngew ka jingmut jong kane ka jingïalang mynta ka nsgi ka long kyrpang eh ban pynkhlaiñ ïa ka party ha kine ki sngi ban wan bad ban pylleit jingmut ha ki khun samla kiba long ka jingkyrmen ïa ka Ri bad ka jaitbynriew.
‘Kum ka party ka don ka jingkyrmen skhem ba kan wan biang ha ka bor synshar hapoh ka jylla’ namar kumba ka long mynta ka jylla ka don shibun ki jingeh tad haduh ba la hap ban shah pynbor ha ka ïing kashari ba don burom na ka bynta ban leh ïa ki kam ba donkam, ong ba Sutnga
Ula pynsngew ruh ha ka jaka ban pynrung ïa ka Ktien Khasi hapoh ka khyrnit ba 8 jong ka riti synshar ka ri India, hynrei ka sorkar kmie kala ïaleh pynban ban pynrung da ka ktien Hindi hapoh ki jaka pule puthi jong ki khynnah skul wat shapoh ka thaiñ North East.
Shuh shuh ula kynthoh jur ïa kane ka sorkar jylla MDA ba mynta kaba la kular ban pyllait ïa u Dewiong hynrei haduh mynta ka jingshynshar bym hok ka dang treikam da kita ki High Level kiba ïoh ban kamai da ki phew klut tyngka nalor ba la pyntreikam ïa ka hukum jong ka NGT.
Wat ïa ki jaka kiba don hapoh ka Jylla Meghalaya la dep ban die lut sha ka Assam da kaba u ong ba ka ‘Meghalaya ka dei kum ka nongai katba ka Assam pat ka dei ka nongshim’. Lada khieñ ïa ki jaka jong ka Meghalaya ïa kiba la ïoh jingtip tikna ka la poi sha ka 20 hajar Square Kilometer ka jingduh noh ki jaka.
‘Kum ki nongshong shnong ka jylla ki don ka hok ban pynsngew ïa kine ki jingeh jong ki pyrshah ïa ka sorkar’. U ma Sutnga ula ong halor kane ka nongrim ka seng Congress kam ailad satia wat tang shi inshi ka khyndew ban leit shapoh ka Assam’, wat ki jaka kiba don ha ‘Block-1 bad II’ ka party ka ïakhun ban pynphai biang ïa ki shappoh ka jylla Meghalaya.
U Vice President MPCC Nehemayah Tyngkan ula pynsngew ba ka seng Congress ka don ka jingkyrmen skhem ba ka Party kan kiew biang shakhmat ha kine ki sngi ban wan, kane kan urlong da ka jingïasnohkit lang jong ki paidbah nongshong shnong. Na ka liang jong u ma Tyngkan ula kynthoh jur ïa kane ka sorkar mynta kaba dap tang da ki jingkular suda ‘kiba long ki kam thoh kam shukor’ ïa ki paidbah.
Ha ka juh ka por u ma Nehemayah Tyngkan ula pyntip ruh hadien ka jingbishar ba bniah ula shim ïa ka rai ban ïakhun biang kum u kyrtong MLA na ka 4-Mowkaiaw Constituency na ka Party Congress.
Katba u samla Adrian L C Mylliem ula ïaathuh kat shaba ngi phai mynta la dap satang ki jingeh ha manla ki jaka hapoh ka jingshynshar jong ka sorkar MDA ba mynta, da kaba ai nuksa ka jingkiew dor ki marbam mardih, ki lad ïohkam ïohjam, ki jingeh ki nongshong shnong ha ki jaka khappud bad kiwei kiwei de.
Halor kine ki jingeh wat na ka liang jong ki kiba don jingmut ban pynsngew sha u Myntri Rangbah hynrei la shah khang lynti pynban ïa ki ban ïakynduh markhmat ïa u Myntri Rangbah hynnin ka sngi 12 tarik ha Shillong.
‘Ka seng Congress hapoh ka Ri-Lum Jaiñtia ka kwah ban pynshai sha ki paidbah ba ka Party ka dang don ka nongrim ba skhem lyngba kikam ba bha kiba ka la leh ha ki por ba ladep, da ka ïa nujor ïa ki kam ba kane ka sorkar ba mynta kaba la leh dusmon ïa ki paidbah’ ong u ma Parien, haba pynkut u kyntu jur ïa ki paidbah ba kin ai ka jingkyrshah ba pura ïa ka Party Congress ha kane ka Election ban wan khnang ba kan ïoh ban ai ka jingshakri kaba bha tam ïa ka jylla hi baroh kawei.