Shillong, ïaïong, 28: Arngut ki briew ki la duhei ïa la ka jong ka jingim hadien ba ka kali Maruti Alto kaba ki shong kaba don ïa u nombar ML-10 5061 ka la leit tynrah ïa kawei ka kali Bolero Pick-up kaba don ïa u number ML 05 R 9552. Ïa kine ki ar ngut kiba la khladnoh, la tip kyrteng kum u Bah Bunpor Marbañiang, 42 snem ka rta uba sah ha Umlyngka, Mawpun bad ka Kong Aiiolinsha Nongrum, 42 snem ka rta ka basah ha Umlyngka, Lailad Kynton. Kine ki arngut ki la khladnoh hadien ba ki la mynsaw jur.
Kane ka la jia ha sngi Palei ha ka por kumba 11:00 baje eiei mynstep ha surokbah ha ka shnong Baniun, Upper Shillong.
Ka jingïatakhuh jong kine ki ar tylli ki kali kat haduh ba kin da julor, ka dei na ka daw ka jingbakla jong u nongniah ka kali Maruti Alto kaba wan mar pyrshah bad kaba dang wan lyngba ka surok na ka thaiñ Shillong katba ka kali Pick-up kaba kit maw ka dei kaba wan na ki thaiñ Mylliem.
U nongniah jong ka kali Bolero Pick-up ruh u la mynsaw bad la pynkit noh ïa u marmar sha ka jaka ai jingsumar katba u Handyman u la shu mynsaw malu mala.
