Ïatai ki riewshemphang halor ka jingdonkam ban pynneh pynsah ka kam pynkoit da ki kynbat

Shillong, Nailar 01: Ka Shillong Law College ka la ïoh ban pynlong ïa ka seminar ba shisngi ban sam ïa ki jingshem na ka Chief Minister’s Research Grant Project titled “Balancing Traditions and Legal Responsibility: Liability of Traditional Healers in East Khasi Hills”, ha kaba kane ka seminar la wan ban long kongsan da u Sampath Kumar, IAS, Principal Secretary ka tnat Health & Family Welfare ka sorkar jylla bad u Bah C. Pohlong, Joint Secretary ka Executive Committee, Khasi Hills Autonomous District Council, kum u Special Guest. La donlang Principal bad ki dkhot ka Governing body ka Shillong Law College.
Ïa ka seminar la pynïaid da u Bah Thomas Iangjuh, Junior Scientist ha Bio Resources Development Centre (BRDC), Shillong. Ki riewshemphang kiba la don ha rynsan ki kynthup ïa u Advocate u Bah Erwin?K.?Syiem?Sutnga, Dr. Junie Pearl Lyngdoh Senior Scientist ka BRDC, Dr. Pradip Sadaram Mohurle, Assistant Professor ka NEIAH bad Dr. Daiahunlin Mawlong, Principal Investigator and Assistant Professor ka The Shillong Law College.
Ïa kane ka jingwad bniah la leh da ki nonghikai, ba kynthup ïa Dr. Daiahunlin Mawlong, Dr. Arpita Singh, kong Yophika Grace Thabah, kong Lahunlang Kurbah bad kong Darishisha Jyrwa ka Shillong Law College Shillong.
Ha kane ka sngi ka la don ka jingïashim rai kaba ïamonlang halor ka jingdonkam kaba kyrkieh ka aiñ kaba long tang kawei ha kylleng ka Meghalaya ka ban pynïaid ïa ki rukom pynkhiah katkum ka juk ki longshwa manshwa. Ki Panelist ki la ïathir ruh halor ki jingpynkylla ïa ka The Khasi Hills Autonomous District ( Protection and Promotion of Khasi Traditional Medicine) Act, 2011, ban bsut ïa ki kyndon bashai na ka bynta ki ethical code, ki kyrdan ai syrnot, bad ka jingleh kaba bakla.
U Advocate Bah Erwin Syiem Sutnga u la banjur halor ka jinglong kongsan ki kam aiñ, da kaba kyrshan ïa ka Meghalaya ban pyntreikam ïa ka aiñ ba kynthup ïa ka thaiñ Jaiñtia bad Garo Hills, da kaba lumlang ïa ka kyntien “coordination, not interference.”
Dr. Junie Lyngdoh la banjur ïa ka jingkordor ban wanrah ïa ka voluntary certification scheme, ka jingbuh jingthoh ïa ki formal Code of Ethics, bad ban buh ïa ki professional ethic bad disciplinary committee halor kane ka kam. Ka la pynpaw ka jingdonkam ka jingïatreilang hapdeng ki nongpynkoit da ki kynbat bad ki rukom pynkoit da ki doktor ka juk mynta khnang ban don ka jingïatreilang ha kiba bun ki liang. Katba Dr. Pradip Mohurle u la pynpaw ka jingdonkam ban pynleit jingmut ha ki prokram ai jinghikai bad kiwei kiwei.
Ka panel ka la mynjur halor ka por ba treikam ki jingthung ba lah ban shna dawai, ka jingdonkam ban pynïasoh ïa ki sakhi kane ka juk bad ki rukom pynkhiah ba ju leh ha ki por mynshwa. Dangshen ka Bio-Resources Development Centre (BRDC) kaba hapoh ka tnat PIP&SD ka sorkar Meghalaya ka thmu ban kyntiew bad ban ïada ïa ki rukom pynkhiah ki trai ri trai muluk ha ka jylla da kaba sdang ka jingai syrnot ne ka certification of Traditional Healers hapoh ka Voluntary Certification Scheme for Traditional Community Healthcare Providers (VCSTCHP) jong ka Quality Council of India.
Kane ka prokram ka thmu ban pynïoh ïa ki THP haba ïadei bad kiba bun ki scheme ka Ministry of AYUSH, GOI. Kumba 9 tylli ki Traditional Community Healthcare Providers (TCHPs) ki la ïohpdiang ki syrnot hapoh ka ISO/IEC 17024:2012 (globally recognized) standard.
Na ka liang u Sampath Kumar, IAS, kum u kongsan u la banjur halor ka jingdonkam ban pynneh pynsah, ban ïada bad ban kyntiew ïa ka jingpynkhiah ba la hikai da ki longshwa manshwa naba ka long ka bynta ba kongsan halor ka jinghiar pateng ka kolshor ka jylla bad kiwei ki kam pynkoit kiba la leh da ki kynhun jaitbynriew.
Haba ong ba kadei ka kamram ka sorkar jylla ban ïada ïa kum kine ki jingleh, u la khot ïa baroh ba kin pyntip halor kine ki kam, nangta ka jingdonkam ban thaw ki aiñ kiba burom ïa ki jingshemphang ki nongshong shnong bad ban bat ïa ki hok bad ki lad jingïada jong ki paidbah.