Ïatai ki nongthoh khubor bad ki MDC halor ka jing pynneh pynsah ïa ki riti dustur ki Khasi

Shillong, Rymphang 03: Kum shi bynta ka Press Tour sha jylla Meghalaya ba la pynlong da ka Press Information Bureau (PIB), Sorkar India, ka kynhun ki nongthoh khubor na Karnataka mynta ka sngi ka la pynlong ka jingïakren kaba bniah bad ki dkhot jong ka Khasi Hills Autonomous District Council (KHADC) ban sngewthuh kham jylliew ïa ka rukom synshar tynrai jong kane ka thaiñ, ka rukom pynïaid kam bad ki sienjam ba ïadei bad ka roi ka par.
Ïa kane ka jingïakren la pynïaid da u Bah Strong Kharjana, Chairman ka KHADC. Ki heh ophisar bad ki dkhot jong ka Council kiba la ïadonlang ha kane ka sngi ki kynthup ïa u Bah Powell Sohkhlet, Executive Member, Information Technology, bad kiwei kiwei, Bah Seibor Warbah, Executive Member, Finance, Bah Denzil Chen, Executive Member, Elaka, Kong Deiti Majaw, Executive Member, Law, bad Bah D. G. Syiemïong, Secretary, Executive Committee.
Ha kane ka jingïakren, ki dkhot ka KHADC ki la ai ka jingbatai kaba bniah halor ka bynta, ka bor bad ka jingkitkhlieh jong ka Autonomous District Council, kaba treikam hapoh ka Sixth Schedule jong ka Riti Synshar jong ka Ri India. Ki la batai kumno ka KHADC ka don ka bynta kaba kongsan ban pynneh pynsah ïa ki riti dustur, bad ka kolshor jong ka jaidbynriew Khasi, ha kajuh ka por ka pynbeit ïa ki jingdonkam ha ka liang ka synshar khadar bad ka roi ka par jong ka thaiñ.
Ki dkhot jong ka Council ki la batai bniah halor ki bynta bapher bapher jong ka synshar khadar, kynthup ïa ka jingtreikam jong ki bor shnong, ka jingpynïaid ïa ki Elaka, ka jingpyntreikam ïa ki riti dustur, bad ki rukom pynïaid ïa ka khyndew ka shyiap bad ki jingdon jingem. La ban jur ïa ka jingdonkam jong ka jingïashim bynta jong ki paidbah bad ka jingshim rai kaba pynshong nongrim ha ka jingïasngewthuh jingmut ha kaba pynneh ïa ka jingïatylli ha ka imlang sahlang bad ka jingsynshar kaba treikam ha ki shnong.
La ïakren ruh ïa ki mat kiba ïadei bad ka jingpynïaid ïa ka kam pisa tyngka, ki kyndon aiñ, ka jingpyndonkam ïa ka information technology ha ka jingsynshar, bad ki sienjam pynroi ba la shim da ka Council. Ki dkhot ki la kren ruh shaphang ki sienjam kiba dang ïaid shakhmat ban pynkhlaiñ ïa ka bor treikam jong ki tnat treikam, ban pynbha ïa ka jingai jingshakri, bad ban weng ïa ki jingeh kiba ïadei bad ka roi ka par katba ki dang ïada ïa ki hok jong ki trai ri trai muluk bad ka jingpynneh pynsah ïa ka mariang.
Ka kynhun ki nongthoh khubor ka la ïakren bad ki nongïalam jong ka KHADC, da kaba wad jingshai halor ka jingtreikam jong ka rukom synshar dalade bad ka jingïadei jong ka ha ka synshar khadar ha kane ka juk mynta. Ka jingïakren ka la ai ïa ki nongthoh khubor ka jingsngewthuh kaba kordor shaphang ka rukom synshar ba kyrpang jong ka Meghalaya, kaba pynïasohlang ïa ki riti dustur kiba la rim bha bad ki rukom synshar ba mynta.
Ki nongthoh khubor kiba la wan shane ki la sngewnguh ïa ka lad ban ïakren markhmat bad ki nongïalam jong ka KHADC bad ki la ong ba ka jingïakren kan ïarap ban pyni ïa ki jingshisha shaphang ka jingsynshar bad ka kolshor jong ka Meghalaya sha ki briew jong ka ri.
Ka Press Tour sha Meghalaya ka dang bteng ban ai ïa ki nongthoh khubor ïa ka jingsngewthuh shaphang ka kolshor, ka jingsynshar, bad ka jinglong ka roi ka par jong ka Jylla, kaba kyntiew ïa ka jingsngewthuh kaba kham bha lyngba ka kam pathai khubor kaba don ka jingkitkhlieh.