Ïatai ki Nongbishar jong ki phlim shaphang ka bynta kaba nang kylla jong ka jingbishar ïa ki phlim ha ka IFFI kaba 56

New Delhi, Naiwieng 28: Da kaba pynskhem biang ïa ka bynta ba kongsan jong ki nongbishar bniah ïa ki phlim, ki nongthoh khubor bad ki nongpeit bniah ïa ki kam shna phlim ha pyrthei, ka International Film Festival of India (IFFI) kaba 56 ka la pynlong ïa ka jingïamir jingmut kaba pynkhih mynsiem kaba la ai kyrteng “Beyond the Thumb – The Role of a Film Critic: A Gatekeeper, an Influencer or Something Else?”
Ka jingïalang ka la pynïasoh lang ïa ki nongbishar ba pawnam na kylleng ka pyrthei ban wad bniah ïa ka jingkylla jong ka rukom bishar bniah ïa ki phlim ha ka juk ba bun ki jingpynthut ki kam digital, ka jingktah jong ka social media, bad ka jingpeit stet ïa ki prokram.
Ïa kane ka jingïakren la pynïaid da u Davide Abbatescianni bad la ïashim bynta da ki nongbishar ba pawnam ïa ki phlim Barbara Lorey de Lacharrière, Deepa Gahlot, Sudhir Srinivasan, Meghachandra Kongbam, Elizabeth Kerr, bad Baradwaj Rangan.
Haba sdang ïa ka jingïakren, u Davide Abbatescianni u la kren shaphang ki jingkylla ba phylla kiba pynkylla dur thymmai ïa ka jingbishar bniah ïa ki phlim mynta. Katba ki phlim ba pynïaid ïew kiba pawnam kim lah ban shaniah than ha ki nongbishar, u la ong, ki nongshna phlim shimet bad kiba dang sdang ki shaniah shibun ha ki jingbishar bniah kiba pyrkhat bha bad kiba lah ban ngeit. U la pynpaw ruh ïa ka jingsngewkhia halor ka jingduna ka bor edit ha ka juk kaba palat 150,000 ki nongpynmih online bad ka jingphiah kaba nang kiew jong ka jingïakren kaba kongsan. U Davide Abbatescianni u la maham ba da ka jingkiew jong ki prokram ba la pynmih da ka AI, ka lawei jong ka jingkynthoh ka lah ban ïakynduh ïa ka “jinglong kaba wanrah jingjynjar”.
“Ki nongbishar ki dei ban pynmih ïa ka jingkwah ban tip” – Barbara Lorey de Lacharrière
Ka Barbara Loreyde Lacharrière ka la ong ba ka kamram ba kongsan jong u nongbishar ka long ban long kum uba don hapdeng ka phlim bad ki nongpeitkai, ban ïarap ïa ki nongpeitkai ban lap ïa ki phlim kiba ym da pynïaid ïew. Hadien ba ka la thoh shibun shaphang ki phlim na ki thaiñ jong ka India bad ki phlim Turkey New Wave na ka bynta ki kot khubor jong ka Europe, ka la ban jur ïa ka jingsngewtynnat jong ka ban wanrah ïa ki phlim kiba kham duna ka jingtip sha ki paidbah kiba kham bun. Ka la kren shaphang ka jingduna ki jingthoh bad ka jingkylla sha ki rynsan digital kum ki jingeh kiba khraw, da kaba kdew ïa ka jingwad bniah na France kaba pyni ba 80% na ki nongthoh phlim kim lah ban shaniah tang ha ka jingshah bishar na ka bynta ka kamai kajih jong ki. Ka la kren ruh shaphang ka jingpynleit jingmut kaba nang jur ha ka jingpynïaid ïew dalade, ha kaba ki Nongbishar hi ki kylla long ki “product”, khamtam eh na ka bynta ki samla nongpeitkai.
“Ka Jingplie lad ka la ïalam sha ka jingdon nongbud, Ym Sha Ka Jingkynthoh” – Ka Deepa Gahlot
Ka Deepa Gahlot ka la buh jingkylli hato ka jingplie lad ha kane ka kam ka dei ka jingkyrkhu ne ka jingma. Ka la maham ba bun na ki jingkynthoh online mynta ki dei kiba la pynwandur da ki nongkyrshan, ka jingbym don ka jingjylliew, bad ka jingktah kaba pynshong nongrim ha ka jingïoh lad, ha kaba katto katne ki nongpeit bniah ki shah siew ban ai ïa ki rating khlem ka jingbishar bniah bha. Da kaba ki nongpeitkai ki nang kham pyndonkam ïa ki phlim ha ki rynsan OTT, ka la ïohi ïa ka jingduna ha ka jingsngewnguh ïa ka jingriewspah bad ka jingstad jong ka kam shna phlim.
Ka jingkylla sha ka digital ka dei ka jingkylla kaba khraw tam – Sudhir Srinivasan
U Sudhir Srinivasan u la ban jur ïa ka jingkylla na ki kot khubor sha ki lad pathai khubor digital kum ka jingkylla kaba khraw tam. Hadien ba u la kynriah na ka jingthoh sha ka jingpynmih ïa ki video jingbishar ba lyngkot, u la kam ba ki rukom pynïadei bad ki nongpeitkai ki la nang kiew, hynrei u la kyntait ba ka rukom kynthoh jong u ka dang sah kumjuh. U la pyrshah ïa ki jingsngewkhia shaphang ka jinghiar ha ka akor, da kaba ong ba katba mynshuwa tang katto katne ki lad pathai khubor kiba khlaiñ bor ki la synshar ïa ka jingkynthoh, mynta ki “hajar surbarit” ki pynlong ïa ka jinglong jingman kaba kham plie lad lang ïa baroh. U la pynpaw ïa ka jingngeit ba ki nongpeitkai ki lah ban pynïapher hapdeng ki jingbishar ba shisha bad ki jingbishar ba la kyrshan.
“Ngi Donkam Kham Shuh Shuh ïa ka Jingsngewthuh Shaphang Ka Kolshor Shna Phlim” – Meghachandra Kongbam
Haba mihkhmat ïa ka FIPRESCI (The International Federation of Film Critics), u Meghachandra Kongbam u la ban jur ïa ka jingdonkam ban kyntiew ïa ka kolshor shna phlim bad ban pynkhlaiñ ïa ka jingsngewthuh paidbah shaphang kane ka kam. Watla u pdiang ba ka jingplie lad ka la wanrah katto katne ka jingkulmar, u la kynthoh ba ki nongshna phlim shimet ki dang shaniah shibun ha ki Nongbishar bniah ban poi sha ki nongpeitkai. U la ong ba da ka jingithuh jong ka Sorkar India ïa ka phlim kum shi bynta ka ïoh ka kot ba thymmai, ki jingïalang halor ka jingbishar bniah ïa ki phlim kin long kiba kordor.
“Ki Nongbishar bniah ki dei ban shem ïa la ka jong ka sur” – Elizabeth Kerr
Ka Elizabeth Kerr ka la ban jur ïa ka jingkiew ha ki rynsan bad ka jingdawa ïa ki prokram ba bun jait. Kum ka nongthoh na ka bynta ki kot khubor bapher bapher kiba don ki jingthmu bapher bapher ha ka kam thoh kot, ka la ban jur ïa ka jingdonkam jong ki kritik ban pynroi ïa la ka jong ka sur, ka rukom thoh bad ki nongsngap ba kyrpang jong ki. Ka la pynpaw ka jingsngewkhia shaphang ki Nongïalam ba kongsan (KOL) kiba ju shah thung ha ki nongsam bad kiba da ka jinglong tynrai ki sngewtynnad ban ai ïa ki jingkynthoh kiba bha, da kaba khot ïa ka kum ka jingeh kaba kongsan ha ka akor ka burom mynta. Ka la kyntu ïa ki kritik ban bishar bniah ïa ki phlim katkum la ka jong ka jong ka kyndon bad ban kiar na kaba kyntait ïa kano kano ka kam na ka bynta kawei ka jingduna bad ban klet ïa ki jingkhlaiñ.
U Baradwaj Rangan halor ka kolshor ïashim bynta lang ha ki lad pathai khubor digital
U Baradwaj Rangan u la kren shaphang ka jingïaid lynti jong u ha kylleng ki kot khubor, ki lad digital, bad ka blogging naduh ba sdang ki snem 2000, bad u la ong ba digital media ki wanrah ïa ka jingai jingmut ba mardor bad ka kolshor ïashim bynta, kaba pynïar ïa ka jingdon jong ki sur ba kynthoh bad pynduna ïa ka jingktah jong ki nongap khyrdop tynrai. Hynrei, da ka jingïakhun kaba jur, ki kritik mynta ki ïakynduh ïa ka jingpynbor ban pynmih ïa ki jingbishar bniah mardor hadien ba la pyllait ïa ka phlim-kaba ïapher bak-ly-bak na ki rukom leh ba mynshuwa jong ki kot jingbishar bniah ha ka Sngi U Trai. U la ai nuksa na ka Pauline Kael bad u Roger Ebert ban pyni kumno ki juk kiba mynshuwa ki ai kham bun ka por bad ka jaka ïa ki kritik ban pynwandur ïa ki jingïakren shaphang ka kolshor. Mynta, u la kynthoh, ki kritik ki dei ban ïaid lyngba “ka bynta jong ka jingïalehkai” jong ka jingkhmih lynti ïa ka jingkynthoh jong ki paidbah, khamtam eh bad ka jingsngewtynnat jong u Gen Z ïa ki jingthoh kiba sngewtynnad, kiba stet.
Katba ka jingbishar bniah ïa ki phlim ka dang ïai bteng ban kylla ha ka jinglong kaba nang kylla sha ka digital bad kaba plie lad ïa baroh, ki nongïashim bynta ki la pynpaw lang ïa ka jingdonkam jong ka jingshisha, ka jingjylliew, ka jinglong laitluid kaba kongsan, bad ka jinglah ban pynïadei. Kane ka jingïamir jingmut ka la pynskhem biang ba watla ki rukom bad ki nongpeitkai ki lah ban kylla, hynrei ka jinglong tynrai jong ka jingbishar bniah-ka jingïadei kaba pyrkhat bha bad ki kam shna phlim-ka dang long kaba kongsan bha na ka bynta ka jingbha jong ka kam shna phlim.
Shaphang ka IFFI
La sdang ha u snem 1952, ka International Film Festival of India (IFFI) ka ïeng skhem kum ka jingrakhe kaba la rim bad kaba heh tam ha South Asia ha ka kam ba ïadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar India bad ka Entertainment Society of Goa (ESG), ka Sorkar Jylla Goa, kane ka tamasa ka la nangroi sha ka jaka ba don bor ha ka pyrthei ha ka kam pynmih phlim-ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ïalade ha kane ka kam ki ïakynduh ïa kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta-ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20-28 tarik u Naiwieng, ka bynta kaba 56 kan don ki bynta jong ki ktien bapher bapher, ki jait phlim bapher bapher, ki jingsaiñdur thymmai, bad ki sur-ka jingrakhe ïa ka jingtbit ka India ha ka kam saiñdur jong ka pyrthei.