Shillong, Naitung 18: Ka jingialang kaba 29th jong ka North Eastern Regional Power Committee la pynlong hapoh ka jinglong Chairman u Myntri ka tnat Bording ka sorkar u AT Mondal ha Guwahati.
Ha kane ka jingïalang la wan ban shim bynta da u Advisor ka sorkar Arunachal Pradesh, ki Myntri Bording ka jylla Mizoram bad Tripura, dkhot ka GO NT CEA, Managing Director NETC, Member Secretary NERCP, ki nongmihkhmat ki jylla kane ka thaiñ shatei lammihngi, bad ki ophisar ka PGCIL, NTPC, Grid India bad NEEPCO bad la ïatai ruh halor ka jingduna ka pisa jingïarap na ka tnat MoP.
Ha ka jingïalang ki Myntri ka tnat Bording ki la wanrah ruh ïa kiba bun ki mat kiba long ki jingmyntoi ym tang na ka bynta ki jylla jong ki, hynrei na ka bynta ka jingmyntoi jong kane ka thaiñ shatei lammihngi.
Ki Myntri kiba la shim bynta ki la kren shaphang ka Sikkim naba kumba long mynta ki skhim ba ïadei bad ka kam bording la pynïasoh hapoh ka Eastern Region bad kumta ïa kine ki skhim dei ban pynïasohlang noh sha ka north-eastern region bad kaba kynthup ha ka North-Eastern Regional Power Committee. Kane kan pynmih ïa ki lad jong ka jingai bhah ïa ki power project ki ban wan sha Sikkim bad sha ki jylla ka thaiñ shatei lammihngi.
Shuh shuh, naba ka Sikkim ka don ïa kajuh ka jingheh jingïar u pud u sam kum kiwei pat ki jylla kane ka thaiñ shatei lammihngi kumta, bun na ki scheme kiba hapoh ka transmission bad distribution ba la pyntreikam ha Sikkim ki ïasynriem bad kiwei pat ki jylla kane ka thaiñ.
Na ka liang ki Myntri ki la pynpaw ïa ki kam haba ïadei bad ka jingduna ka pisa na ka bynta ki transmission project kiba la pyrkhat kam bad ba la pynskhem da ka CEA na ka bynta ka jylla Meghalaya da kaba wanrah ïa ka skhim kaba synriem kum ka NERPSIP khnang ba ka jingkhia halor ka jingduna pisa na ka bynta kano kano ka jingtei ïa ka transmission ladei ban kyntiew bad ba ym dei ban aiti tang sha ki nongpyndonkam ïa ka bording.
Halor kane, la pdiang da ka CEA hynrei ki la pan pat ïa ki DPR na kiwei pat ki jylla kumjuh.
U Myntri ka tnat bording ka sorkar jylla u AT Mondal u la pynpaw ka jingpyrshah kaba jur halor ka jingdonkam kaba rit ka jingdon ki nongtrei ha SLDC ba la ithuh da ka Ministry of Power bad ba kam dei ban ïasoh lang ïa ka jingsiew pisa kaba hapoh ka PSDF.
U la kyntu ruh ïa ki dkhot kiba mihkhmat na ki jylla ban aiti ïa ki rai sha ka MoP ban shong bishar kam haba ïadei bad ka jingdonkam nongtrei kaba duna ban buh hapoh ka Emerging SLDC’.
Na ka liang Member Secretary NERPC u la mynjur ïa ka non-linkage ka rukom siew pisa kaba hapoh ka PSDF na ka bynta ka jingdonkam ban buh ki nongtrei.
Ïa ka shithi sha ka MoP la dep ban phah ha kaba ïadei bad kane ka kam kaba la wanrah ka jingpynhiar mynsiem na ka bynta ka jylla.
Ha kane ka jingïalang u Member Secretary u la pdiang ruh ïa ka jingdawa ban shim khia ïa ki kam ba la pynpaw ha ka jingïalang ban ïakren bad ka MoP bad ka CERC na ka bynta ban ïarap ïa ki jingdonkam kumba la pynpaw da ki Myntri ka tnat Bording.
