Shillong, Nailur 15: Ka jingthnum halor ka jingbym biang treikam ka MeECL ka la mih ym tang na ki paidbah, hynrei mynta ka sngi ka la mih ruh na ka liang ki nongmihkhmat paidbah, ha kaba ki MLA na ka Liang Synshar bad Liang Pyrshah ki la ïatylli lang ban pynpaw ïa ka jingbymler treikam kane ka bor ba peit ïa ka tnad bording ha ka jylla.
Kane ka la mih ha ka jingïatai halor ka mat ba la wanrah da u Bah Esmatur Mominin MLA ka Phulbari hapoh ïingdorbar, uba dei u MLA jong ka Seng NPP, lyngba ka Motion.
Haba wanrah ïa kane ka mat, u Mominin u la pynpaw ba ki paidbah ki la mad shibun ki jingeh namar ka jingtreikam bha ka MeECL. U la kdew ba ki don ki ïing kiba ka bai ding elektrik ka kiew da ki hajar hajar man la ka bnai. Nangta u la kdew ruh halor ka jingbymbiang ki transformer ha kylleng kylleng ki jaka bad kane ka la buh jingeh ïa ki paidbah.
U la pynkynmaw ba kumba shiphew ne khatsan snem ka Meghalaya ka dang shalan bording sha ki jylla kiba marjan bad wat shabar ri ruh. Hynrei mynta ka la kylla long ka jylla kaba kyrdih bording elektrik bad hap ban thied kylla na shabar.
U la kyntu ïa ka sorkar ba kan peit halor kane bad ban thaw ki lad ki lynti ban pynlong biang ïa ka Meghalaya ka jylla ba pahuh ka bording.
Kiwei kiwei pat kiba la ïashim bynta ha kane ka Motion ki long u Bah Gavin Mylliem, MLA Sohra, Bah Balajied Synrem, MLA Shella, Bah Pius Marweiñ, MLA Ranikor, Bah HM Shangpliang, MLA Mawsynram, ka Ferlene Sangma, MLA Salsella bad kiwei kiwei.
