Shillong, Jylliew 26: Ka Ïingdorbar Thawaiñ jong ka KHADC ha ka sngi Ba-ar ka la ïatai halor ka jingjur ka jingwan rung kyrthep ki briew kiba na ka jylla Manipur sha ka jylla hadien ba ka mih ka jingïakynad jaidbynriew ha katei ka jylla.
Haba shim bynta ha ka mat ïatai ba la wanrah da u Bah Bindo M Lanong, u Nongïalam ka Liang Pyrshah u Bah Titosstarwell Chyne u la ong ba ka jingwan jong kine ki briew ban riehtngen shipor ha ka jylla dei ban da shim jingkheiñ bin pa bin da ka sorkar khnang ba ynda ka shongsuk shongsaiñ ka la wanpahi biang ba kan ïoh ban phah biang noh sha ka jaka ba ki wan.
“Ka EC ka dei ba thoh sha ka sorkar jylla ban buh da ka refugee camp na bynta kine ki briew kiba wan ban riehtngan ha ka jylla ym ban shah ba kin krih kylleng ki bynta ka jylla ban shongwai namar lada leh kumta kin sa long syndon ki nongshong shnong pura ka jylla ha kawei ka sngi bad shuwa ban jia kata ka apot ngi dei ban leh eiei”, u la ai jingmut.
“Na ka liang ka EC kaba rim ngi la ai ka jingbthah sha ki Dorbar Shnong ba ki dei ban pyrkhing ïa ka jingwai ïing sha ki briew kiba na bar jylla khlem kino kino ki kot ki sla kiba biang bad nga kyrmen ba ka EC ba mynta kan bbud ïa kane ka dienjat ba ngi la leh”, u la bynrap.
U la ong ruh ba lada aili than kan poi ba kine ki nongwan riehtngen ha ka jylla kin pyni bor kylla ïa ki trai shnong bad ki bor synshar tynrai ka jylla kumba la jia ha ki katto katne ki refugee colony.
Shuh shuh u la kam ruh ba kane ka jingwan rung ïi briew na ka jylla Manipur ym tang ba ki pyrshang ban wad jaka riehtngen ha Shillong hynrei ki krih ruh ha ki bynta khappud ka jylla kum ha Maikhuli bad kiwei ki jaka.
Haba kren halor kane ka mat ïatai u Bah Bindo u la ong ba kane ka jingwan riehtngen shipor kine ki briew ha ka jylla ka pyntieng ïa ki trai muluk ïoh ba kin shongduh syndon shijunom bhor ha ka jylla bad na kata ka daw na ka liang la Council bad sorkar jylla ka dei ban leh eiei ïa kane.
“Haba don kum kane ka jingjia dei ban ïarap ïa ki lanot hyrei ryngkat bad ki kyndon ba tang shu wanphai ka suk ka saiñ ki dei ban leit sha la ka jylla ba ki wan ym ban shongduh hangne”, u la ong.
U MDC ka UDP naPariong-Mawthadraishan u Bah Jambor War u la ong ba kane ka mat ïatai ka dei kum ka jingkyrsiew thiah ïa ka sorkar ba ka dei ban leh sted ban pynïoh ïa ka ILP ha ka jylla ban teh lakam ïa ka jingwan ki briew kiba na bar.
Na ka liang u MDC ka Nongthymmai u Bah Latiplang Kharkongor u la ong ba wat hadien shibnai ba ka don ka jingwan rung kyrthep kiba na Manipur hynrei ka sorkar jylla kam shym la shim ïa kino kino ki sienjam ban shim jingkheiñ ïa kine ki briew bad u la ong ruh ba ka constitunecy jong u ka dei ka jaka ba kine ki briew ki wan ban rieh tngen la ka dei ha Madanrting ne Lapalang bad kiwei kiwei ki shnong, ‘kaba donkam ka long ban tehlakam ïoh ba kin long ki nongshong shnong pura ha kawei ka sngi,’ u la ong.
U la ong ruh ba ka jingwan kine ki briew ha kine ki thaiñ ka long kaba ishynrkhei namar bad miet bad sngi ka jingwan poi jong ki ka long kaba khlem sahngeh bad ym don mano mano ruh ban buh jingkheiñ ïa kane.
Haba jubab ïa kane ka mat ïatai na ka liang u Deputy Chief Executive Member u Bah Pynshngaiñlang N Syiem u la ong ba ha kaba ïadei bad ka jingbthah ban pyrkhing ban aiwai ïing ka EC ba mynta ruh kan ïai pybntreikam da kane hi ka hukum.
“Ngin phah jingthoh sha ki khlieh nongsynshar shnong ba kim dei ban ïaid lait na kane ka hukum bad ba kim dei ruh ban ai kino kino ki syrnot pynshisha nongshong shnong ïa kine ki briew ba wan riehtngen shipor,” u la ong.
U la ong ba ha kaba ïadei bad ka jingdawa ILP na ka liang ka Council kan peit ruh ïa ki aiñ ki rule bad ruh ki regulation ka Council la ki don ne em ki bynta ba lah ban pyntreikam ïa ka ILP jong ka Hima bad ki raid.
