Shillong, Nailar 12: Ka Meghalaya State Geological Programming Board ka la pynlong ïa ka jingïalang kaba 50 jong ka ha ka sngi baar ha kaba ïa kane ka jingïalang la pynïaid da u Bah B S Sohliya Secretary, Mining and Geology Department ban ïakren halor ki lad ban ïada ïa ki marpoh khyndew ha ka jylla.
Ha kane ka jingïalang la wan ban ïashim bynta da M B Tongper Director DMR, Dr S.K. Kulshreshtha, Dy Director General , Geological Survey of India, Kuldeep Baruah Gupta, DGM (Geology), ONGC, Dakshina Rabha , Scientist D from Central Ground Water Board (CGWB), Ibrahim Sharif, Deputy Controller of Mines ,Indian Bureau of Mines (IBM) Guwahati, Bhaskar Basu Regional Director , AMD ha ryngkatlang bad kiwei ki ophisar.
Ha kane ka jingïalang, na kiba la wan ban shim bynta ki la shong bishar kam ïa ki project kiba la pyndep ha ki snem ba la dep bad ïakren ruh halor ki kam kiba la ïoh ki jingjop bad ban khmih ruh ïa ki bynta ba donkam ban pynbha. La ïakren ruh halor ki kam ki marpoh khyndew ha kaba kine ki project kim dei ban ktah.
Haba ïaid shakhmat ha kane ka jingïalang na ka liang ka board ka la wanrah ruh ïa ki rukom pyrkhat kam na ka bynta ki project kiba thymmai na ka bynta u snem 2025-26.
Na ka liang u Bah Sohliya u la banjur halor ka jingdonkam ban ïatreilang jong baroh khnang ban lah ban pynïaid shakhmat ïa kine ki projek ba bun kiba long ruh ki lad ban kyntiew ïa ka ïoh ka kot bad ka jingïada ïa ka sawdong sawkun.
U Bah Sohliya u la banjur ruh halor ka jingdonkam ban pynlong ïa ki jingïalang hapdeng ki tnat ban ïasam lem ïa ki jingtohkit halor ka kam geological naba kane kan ïarap ban kyntiew ïa ka GDP ha ka jylla.
