ïatai ka tnad Food and Civil Supply halor ki mat ban pynkhlaiñ peitngor ïa ka jingkiew dor ki mar ki mata

Shillong, Risaw 30 : Kum shi bynta ban shimkhia halor ka jingkiew dor ki marbam mardih, ka tnad Food & Civil Supplies and Consumer Affairs kala pynlong ïa ka “One Day Workshop on Strengthening of Price Monitoring System” hynne ka sngi Balang. Ka jingthmu ka long ban pynkhlaiñ ka jingpeitngor halor ka jingkiew dor ki mar ki mata ha ki ïew ki hat.
ïa kane ka jingïalang la plie da u Myntri ka Tnad Food, Civil Supplies and Consumer Affairs u Ma Comingone Ymbon ha ka conference hall jong ka Meghalaya Secretariat.
Haba ïakren bad ki nongthoh khubor, u Bah Comingone Ymbon ula pynpaw ïa ka jingkongsan ban pynneh kumjuh ïa ka dor ka mur.
“Ngi lah pynlong ïa ka workshop ban pynkhlaiñ ïa ka price monitoring cell. Ngi lah ïatai sani bha halor katei ka mat bad baroh ki Deputy Commissioner kiba la wan sha ka jingïalang. Ngam kwah ba kan don ka jingkiew dor palat bad dei halor kane ba nga la phah pynlong ïa kane ka workshop” ong u Bah Comingone.
Halor ka jingud ki paidbah ïa ka jingkiew dor ki marbam mardih, u Myntri ula ong, “Mynta ka sngi ngi lah rai ban kyntu ïa u Myntri Rangbah ka jylla ba un wanrah lang ïa baroh ki tnad kiba don bynta kiba kynthup ïa ka tnad Home, Agriculture bad Food & Civil Supplies na ka bynta ban ïatai shuh shuh. Hynrei kane kan urlong hadien ba la dep ka elekshon shiteng samoi ha Gambegre.”
Ka tnad Food and Civil Supplies kala pynmih ïa ka jingthoh kaba la batai bniah ïa ki daw kiba la pynlong ïa ka jingkiewdor ki marbam kiba kongsan kum u khaw, ki jhur ki jhep, ki dai, shana bad kiwei kiwei. Katkum ka jingpynpaw jong ka tnad, ka jingbym slap thikna kala wanrah ïa ka jingtyrkhong bad ha ki katto katne ki jingjia pat kala don ka jingshlei um kaba la pynduna ha ka jingpynmih ïa ki marbam. Ka tnad kala kdew ruh ba ka don ka jingbym biang ha kaba ïadei bad ka jingdawa bad ka jinglah ban pyndap pynbiang bad kala don ruh ka jingrem ha ka dor jongka jingbylla bad ka jingkit jingbah, khamtam ha ki jaka lum jongka Meghalaya kaba la lam sha ka jingkiew dor na ka bynta ki nongthied.
Ka tnad kala kdew ruh ba ka jylla Meghalaya ka shaniah ïa ki katto katne ki marbam kiba wan nabar bad ka dor ha ki shnong ki thaw kala shah ktah na ka jingkylla khah khah ka ïew ka hat hapoh ka ri.
“Ka jinglut ka heh na ka bynta ki nongtrei bad ka jingkit jingbah, khamtam ha ki jaka lum, kala nang pynjur ïa ka jingheh ha ka dor, kaba pynkiew dor kaba leit pat sha ki nongthied” la pynpaw ka tnad sorkar.
Ki sienjam ban pynbeit ïa ki dor:
Kum ka jingshimkhia ïa katei ka jingeh, ka tnad Food, Civil Supplies, and Consumer Affairs kala pynbha ïa ki Price Monitoring Cell (PMC) ha kylleng ki District ban khmih bniah bad ban buddien ïa ka dor ka mur ha ka jingdie kaba man la ka sngi ïa ka Retail bad Wholesale jong ki marbam mardih. Ka tnad kala pynshai “Lyngba ka PMC kila lum bad pynsaphriang ïa ka dor ha ka Wholesale bad Retail jong ki 22 tylli ki marbam mardih kiba kongsan ban ïada ïa ki nongthied bad ban pynthikna ba kitei ki marbam ki dei kiba ki paidbah kin lah ban thied”.
Ka Sorkar India kala pynheh ïa ka thup jong ki mar ki ban buddien na ka 22 sha ka 38 tylli bad kane kala sdang naduh ka 1 tarik u Nailar, 2024, da kaba pynïahap lang bad ki marbam kiba la buddien hapoh jongka Consumer Food Price Index (CFPI) da ka tnad Statistics & Programme Implementation. Kane ka jingpynïar ïa ka jingkhmih bniah ka long ban ai ïa ka dur ka dar jong ka jinglong jingman ki dor ki mur jongki ïew ki hat bad ban ïada ïa ki nongthied nongpet.
Ki kor Digital kiban buddien ïaka dor ka mur
Ka tnad kala buh ruh ïa ka Price Monitoring Cell (PMC) Dashboard, ha kaba da ka MIS la buh ryntih ïa ki dor ki mur ha baroh ki district bad subdivision jong ka Meghalaya. Kane ka dashboard ka pynlah ïaki heh ophisar ban shim ïa ki rai ha ka por kaba dei halor ki iïew ki hat. Ki nongthied nongpet ki lah ban peit ïa ka Retail Prices MIS jongka Meghalaya lyngba ka website jong ka tnad sorkar [https://megfcsca.gov.in/](https://megfcsca.gov.in/).
Ka jingkular ban pynbeit ïa ka dor
U Myntri Sorkar Bah Comingone Ymbon ula pynthikna ïa ki paidbah ba ka tnad ka shimkhia ban ïada na ka Hoarding, Black Marketing bad Artificial Prcie Inflation.
“Ka kamram ba kongsan jong ka tnad Food, Civil Supplies, and Consumer Affairs ka long ban peit ba ki marbam mardih kidei ban long kiba ki paidbah kin kot bor ban thied ïa ki. Ngi ngin trei ban pynthikna ba ka jingpyntreikam pura ïa ki kyndon aiñ bad ki polisi ban ïada ïa ka jingmyntoi jong ki nongdie nongpet” ula ong.
Lyngba kitei ki jingshimkhia, ka sorkar Meghalaya ka thmu ban tehlakam ïaka jingktah jongka jingkiew dor khah khah ïa ki nongshong shnong bad ban pynthiknba ba ki marbam mardih kiba kongsan ki dei kiba baroh ki lah ban ïoh.