Khliehriat Nailar 11:Kum shibynta na ka jingrakhe ïa ka “Azadi Ka Amrit Mahotsav” ka National Commission for Protection of Child Rights (NCPCR), ka State Commission for Protection of Child Rights bad ka ophis u Deputy Commissioner, East Jaiñtia Hills District, Khliehriat hynnin ka sngi ka la pynlong ïa ka prokram campaign ba kyrpang ha Conference Hall ha ka ophis u Deputy Commissioner ha Khliehriat halor ka phang ban ai ka jingïada kaba pura ïa ki khynnah ha kaba baroh ki tnat treikam kiba ïadei bad ki khynnah ba kin peit bniah bha ïa kito ki khynnah kiba don hapdeng ka jingma ban ïada ïa ki ban lait na kiei kiei kiba sniew.
Haba kren ha ka jingialang, u Deputy Commissioner ka East Jaiñtia Hills District, u Abhilash Banarwal, IAS u la ong ba ka sorkar India lem bad ka sorkar Meghalaya ka la shim ïa ki lad ki lynti ban ai jingpysnhai halor ki mat kiba donkam, u la ban jur ruh halor ka jingdonkam ban ai ki jingpynshai ne ki awareness ha kaba ïadei bad ka jingshah ban beiñ ki khynnah (child labour) bad kumjuh ruh ka jingshah ïuhroit ki hok jong ki khynnah, la ong ruh ba kane ka jingthmu kan long kaba sei soh lada ki tnat ki ïatreilang ban pyntikna ruh ba kan nym don shuh ka jingshah rah jubor ki khynnah napoh ka district sha kiwei kiwei pat ki jaka bad ïa kaba kum kane donkam ban long peit ngor bha.
“Ngi donkam ruh ban peit bad bud dien ïa kito ki khynnah kiba pep skul noh tang shiteng por bad kiba phah trei ïa ki khynnah bad lada wad bniah ïa kane kan dei beit na ka daw ka jingban ka duk ka shitom bad na ka liang ka sorkar ka la leh bun kiei kiei ban weng noh ïa ka jingduk” ong u Deputy Commissioner.
U Expert Resource Person, National Commission for Protection of Child Rights(NCPCR), u Abhijit Sharma,, haba kren halor ka jingshah rah bor ki khynnah, u la kren kyllum lang ruh ïa ka jinglong jingman jong kane ka jinsghah rah bor ha baroh ka wei ka ri India, u la kren ruh halor ki hok jong ki khynnah kiba katkum ka riti synshar ri (Constitution) jong ka ri India (Human/Child trafficking), ka jingiohi jngai, ka mission jong ka tnat NCPCR bad ki kam kiba leh kiba katkum ki kyndon kiba hap hapoh ka section 13 bad 14 jong ka CPCR Act 2005, u la iathuh ruh shaphang ka Institution, Agencies, ki skim ban ïada ïa ki khynnah (Child trafficking) bad ka daw tynrai kaba mih na ka jingrah rah ki khynnah na kawei ka jaka sha kawei pat, ka trafficking Network bad kiwei kiwei ki mat kiba ïadei bad ki jingiada ïa ki khynnah.
U District Child Protection Officer, East Jaiñtia Hills District, u bah T.Kyndiah, u la ong ba kane ka jingrah ïa ki briew (human trafficking) ka dei kawei na ki kam sniew (crime) kaba shyrkhei kaba ju jia bha ïa ki kynthei bad ki khynnah
“Dei lyngba ka kiew ka technology jong ki smart phone, ki internet, ki social media ki khynnah bunsien ki ngop ha kiba bun ki kam sniew bad jingshah rah bor ruh” ong u bah Kyndiah, la bynrap ruh ba donkam ka jingtrei ryntih jong baroh ki tnat ha ryngkat bad ki bor synshar district, ki pulit, ka tnat Ditsrict Child Protection Unit, ka Child Welfare Committee, ka Juvinile Justice Board (JJB), ka Childline ryngkat lang ruh bad ki bor shnong, kumjuh ruh ki In charge jong ki Special Juvenile Police Unit bad ka Anti Human Trafficking Unit ba ïada ïa ki kynthei, ki khynnah ban lait na ki jingshah rah bor na kawei ka jaka sha kawei pat bad kumjuh ruh ban ïada ïa ki hok jong ki.
Ha kane ka prokram la ïa wan ruh ban ïa shim bynta na ki tnat bapher bapher, kum na ka tnat pulit, ka DCPU, Child Welfare Committee, ka Juvenile Justice Board (JJB), ka Childline, ki shnong , ki In charge jong Special Juvenile Police Unit bad ka Anti Human Trafficking Unit.
