Ïatai ka JHADC ïa ka jingsiew tulop ka Sorkar, ka jingeh ha Lapangap, ka rukom treikam Digital

Jowai, Naiwieng 20: Ka ïing Dorbar thaw aiñ jong ka Jaiñtia Hills Autonomous District Council (JHADC) kaba la long mynta ka sngi Palei jong ka 20 tarik u Naiwieng, 2025, kala ïatai ïa ki saw tylli ki mat (Motion) bala wanrah da ki MDC ka liang pyrshah na ka bynta ban pynbha pynmiat ïa ka rukom treikam jong ka Council.
Ïa ka Motion ba nyngkong la wanrah da u Bah A.A Shullai kaba ïadei bad ka rukom siew tulop ïa ki nongtrei ka Council da ka sorkar katkum ka jingong jong u Myntri Rangbah ka sorkar jylla bad kaei ka sien jam jong ka JHADC halor kane, u Bah Thombor shiwat ula pynshai ba ka Council kala dep pynpoi ïaka Proposal sha ka sorkar jylla ha ryngkat ki kyndon jingïateh lyngba ka Committee kaba kynthup ïa u DC kum u Chairman, Secretary bad ki Member.
Shuh shuh ki MDC ka liang pyrshah kynthup ïa u Bah Rikut Parein ula shim bynta lang ban ïatai da kaba ong kane ka jingthmu jong ka sorkar ka lah ban knieh ïa ka bor jong ka Council ba teh lakam ïa ka Revenue kaba ïoh lum na ki mar poh khyndew naduh ki Major bad minor bad la kyntu ïa ka Council ba kan pyrkhat ar sien ïa kane.
Ha kaba ïadei bad Motion jong ka Shnong Lapangap kaba dang hap hapoh ka Elaka Shilliang Myntang jong u pud u sam ka JHADC u Bah Shullai ula wanrah ïa kane ka jingïatai namar ka jingshlur jong ki briew Karbi ban wan kam ïa kitei ki jaka ki puta hapoh ka shnong Lapangap. Ula kyntu ruh ïa ka Council balei kam lah ban leit hiar dalade ha katei ka jaka khnang ban shngaiñ ki nongshong shnong bad ban pyntikna ïa ka jinglong hok ka kyndew ka shyiap.
La kyntu ruh ïa ka Council ban pynbiang ïa ki kot ki sla bad ban shah ïa kitei ki shnong ban register khlem jingsiew ïa ka kyndew jong ki namar ka Assam kala sdang ban kyntur pud sha ki bynta jong ka shnong Lapangap.
Na ka liang u CEM Bah Thombor Shiwat haba pynshai ula ong ka don shisha ka jingshah lehbeiñ ki nongshong shnong ka Lapangap ha ki briew jong ka Assam kiba la khang wat ïa ka jingleit hiar rep sha ki pynthor kba.
Na ka liang ka Council kala dep pan ïa ki Pata bad ki Land Holding ban pynshisha ïa ka jinglong trai ïa ka kyndew ka shyiap hapoh ka Coincil bad ïa kitei ki kot la dep ban aiti sha ka sorkar jylla ban ïoh pynbeit ïa u pud u sam hapdeng ka Assam.
Hynrei kumba long mynta ka Assam kala leh bor da kaba kyntur pud bad wan buh ïa ki Beat House jong ki pulit kaba la jia kumjuh haka Block-I bad Block-II, ula ong ruh bunsien ngi la pan jingbit (Appointment) ban ïakren pynbeit bad ka Karbi Anglong hynrei kim juh treh satia bad ka jingmut jong ki Karbi ka long tang ban ïoh thaw ïa ka State la jong, ong u CEM.
Ha kaba ïadei bad ka ka Jaiñtia Hills Autonomous District (Establishment of Elaka and Village Election Act 2015 Appointment, Power, Functions and Jurisdiction of Dolloi/Sirdar and Waheh Shnong) Atc 2015, la ïatai ban pynthymmai biang ïa kane ka aiñ khamtam ha kaba ïadei bad ka bor jong ki Waheh Shnong.
La ai jingmut ka jingïakhun Waheh Shnong ka dei ban long tang ïa ki shynrang bad ban nym issue pathar ïa ki NOC da ki Waheh Shnong sha ki bar jylla kaba lah ban buh jingma hadien habud. La ïatai ruh ba ka Council ka dei ban pynbeit bad pyntikna ïa ki jaka kiba hap hapoh ka jingpeit ki Dolloi.
Katba na ka ling u CEM ula kular ban wanrah ïa kane ka jingïatai ha ka Dorbar ban wan da kaba wanrah ha ryngkat ka Bill (Amendment).
Ban pynsuk ïa ka rukom treikam ka Council katkum ka juk stad ba mynta khamtam ha ki ar tylli ki tnad treikam jong ka Land Revenue bad ka Land Settlement ka Council kala dep ban ïakren ïa kane bad ka sorkar ha kaba ka la don ka skim jong ka sorkar kmie kaba la tip kum ka Digital India Land Records Modernization Programme (DILRMP) ban pynsuk ïa ka rukom leh survey ne thew ïa ki jaka ki puta bad ka rukom buh record kaba biang ïa ki shnong ki thaw, ong u Bah Thombor.
Halor ka rukom pyntreikam ïa ka Digital India Land Records Modernization Programme (DILRMP), u CEM ula pyntip ba shen yn ai jingtip sha ki Shnong ba kin pynlong ïa ka prokram pynsngewthuh paidbah ne ka (Awareness Programme). Da kaba pyntip hapoh ka District la dep pynsngewthuh ha ki ar tylli ki shnong kata ka Mukhla Mission bad ha Mukhla Pyllun.
Katba ïa ka Motion bala wanrah da u Bah Madonbai Rymbai kaba ïadei bad ka bor jong ka 6th Schedule bala pynkup ïa ki Autonomous District Council ha ki tnaiñ shathei lam mihngi kumjuh ïa ki ADC hapoh ka jylla, hynrei na ka liang u Chairman ula pyndam noh ïa ka jingïatai namar ka jingbym shai.