Shillong, Nailur 15: Khatduh ka jingkiew dor ki marbam mardih kaba la ktah bha ïa paid kupknup kup trap, ka la paw ha ïingdorbar, haba u Bah George B.Lyngdoh, MLA ka Umroi, u la wanrah ïa ka mat jingïakren lyngba ka Short Duration Discussion.
U Bah George haba wanrah ïa kane ka mat, u la ong ba ki nongkhaïi ki la ïathuh ba ki don ki khyrdop ha ki surok bah kiba ju lum pisa na ki kali kit mar haduh 7 bad 8 hajar tyngka bad dei kane kaba la long ka daw ka jingkiew jong ki marbam. U la ong ruh ba ka ïoh ka kot jong ki briew kadei kaba donkam bha. U la ong ruh ba ka ïoh ka kot jong ki briew ka la hiar haduh katta katta ha kaba ha u snem 2021-’22 ka la hiar sha ka 1.8 percent.
“Kiba bunki ïing ki sem ki la shah ktah bad ka jingban khia ka la wan ha ki ïing ki sem namar ka jingkiew dor ki mar ki mata, khamtam ki marbam”, u la ong.
Nangta u la kdew ruh ba ka jingkiew ka dor ki marbam kadei ka jingpyntreikam ïa ka GST bad kane ka la nang kyntiew shuh shuh ïa ka dor ki marbam.
U MLA Umroi u la kdew ruh ïa ka jinghiar ka ïoh ka kot namar ka jingduna ne ka jingbym ïoh bylla jong ki briew, ha kaba u la ong ba wat ka kam bylla shispah sngi ruh kaba ju ai bylla ïa ki briew ka la hiar namar ba kiba bun ki VEC ki la sangeh ban pyntreikam kam ïa ki skhim MNREGA namar ka jingbym ïoh ka bai material.
Nangta ki kontraktor kiba rit kum ki Class II bad Class III kiba bun hi kidei ki trai jylla bad kiba ju aikam aijam ïa ki samla bad kiwei kiwei pat kim ïoh kam shuh, namar la knieh lut da ki kontraktor heh.
U Bah HM Shangpliang, MLA Mawsynram, u la ong ba ha kine ki khyndiat bnai baladep, ka dor jong ki jhur ki jhep kala kiew shaba palat, ha kaba ka dor jong u sohsaw ka la poi sha ka 40 tyngka shi kilo bad kumjuh ruh kiwei kiwei ki jhur. Nangta ka jingkiew dor jong ka petrol, ka diesel ka la nang ktah shuh shuh ïa ka dor ki mar ki mata, ha kaba u Bah Shangpliang u la ïathuh ba ka dor jong ki mar ka nang kiew sha ki jaka katba nang jngai na ïewduh.
Shuh shuh u Bah Himalaya, u la pynpaw ruh ka jingsngewkhia kaba jur halor ka jingkiew ne ka jingrem ka bai sumar nongpang. U la wanrah ban pyntip ïa kawei ka jingsumar ïa kawei ka longkmie, kaba hap ban sumar ne puid ïa ka khlieh, ka dor ka poi haduh 2 lak tyngka. “Wat ka skim MHIS ruh kam lah ban pyndap ne ïarap than ha kaba ïadei bad kane ka jingsumar”, u la ong.
U la ong ba mynta ka kharai hapdeng kiba duk bad kiba riewspah ka la nang heh nang heh, namar uba duk u nang duk bad uba riewspah u la nang riewspah.
I Kong Ampareen i la ong ba kum ka kurim, ka kmie i sngewthuh bha kumno ka ktah jong ka jingkiew dor ki marbam mardih. I la ong ba lada ma i kum ka nongmihkhmat ki shem jingeh ban siewbai kali ban leit jingleit, katno tam ki riewa paidbah. I la pynpaw ruh ka jingsngewkhia halor ka jingkiew ka bai skul, ha kaba ki paidbah ki la mad jingeh. I la ong ba balei ka sorkar kam lah ban buh ryntih ïa ka dor jong ka bai skul. Nangta ka jingkiew dor jong ka gas shet jingshet kaba ki briew mynta ki la pyndonkam ha man la ki iing ki sem.
Kiwei kiwei pat kiba la ïashim bynta ha kane ka jingïatai bad pynpaw ka jingsngewkhia namar ka jingshah ktah uba duk basuk na ka jingkiew dor jong ki marbam ki long u Bah PT Sawkmie, MLA Mawlai, Lyngdoh, MLA Shillong East, Bah Mayralborn Syiem, MLA Nongpoh.
