Shillong, Ïaiong 8: U Myntri Rangbah ka Jylla Meghalaya, u Conrad K. Sangma, ha ka sngi Balang, u la ïakynduh ïa u Myntri ka Union Minority Affairs u Kiren Rijiju, ha New Delhi, ha kaba u la pynpaw ïa ka jingsngewkhia halor ki kyndon ba kongsan jong ka jingthmu ban pynkylla ïa ka Foreign Contribution Regulation Act (FCRA) Amendment Bill, khamtam ïa kito kiba ïadei bad ka jingkurup ïa ki mar ki mata.
U Symbud Myntri Rangbah ka Jylla u Bah Prestone Tynsong ruh u la don lang ha kane ka kynhun, kaba kynthup ïa ki nongmihkhmat ba kham rangbah jong ka Catholic Bishops’ Conference of India bad kiwei kiwei ki nongia don bynta lang.
Ka kynhun-ba la ïalam da u President ka CBCI u Anthony Cardinal Poola bad u Secretary General u Anil Joseph Thomas Couto-ki la pynpaw ïa ka bynta ba kongsan ba la leh da ki jaka pule ba la bei tyngka nabar ri ha kaba pynpoi ïa ka pule puthi, ka koit ka khiah, bad ki jingshakri ha ka imlang sahlang ha kylleng ka jylla Meghalaya bad ka thaiñ shatei lammihngi, khamtam ha ki thaiñ ba jngai bad ki riewlum.
Haba pynpaw ïa ka jingsngewkhia halor ki katto katne ki kyndon ha ki jingthmu ban pynkylla, ka kynhun ka la ong ba ki kyndon kiba ïadei bad ka jingshim ïa ki mar ki mata ka la pynmih ïa ka jingsngew artatien hapdeng ki seng Khristan bad ki seng trei mon sngewbha.Ki la khot ïa ka jingiamir jingmut kaba kham jylliew bad ka rukom pyrkhat kaba kham jylliew shwa ban pynkut ïa ka ain.
“Ngi la pynsngew ïa ki jingsngewkhia ba la pynpaw da ki seng niam Khristan, khamtam eh ha kaba ïadei bad ki kyndon kiba ïadei bad ka jingkurup ïa ki mar ki mata, bad ngi la pynksan ïa ka jingdonkam ban don ka rukom treikam kaba ïahap bad kaba ïamir jingmut,” ong u Sangma hadien ka jingïalang.
U la pynpaw ba ki jaka treikam ba la kyrshan lyngba ki jingnoh synniang nabar ri ki la long “kiba la pynkylla dur” ha kaba poi sha ki paidbah kiba duna ka jingshakri, khamtam sha ki jaka kiba eh ha kaba ka jingïoh ïa ki jingshakri ka dang duna.
U Rijiju, katkum ka jingong jong u Myntri Rangbah ka Jylla, u la sngap bad shah shkor bha bad pynthikna ruh ïa ka kynhun ba yn sa bishar bniah ïa ki jingeh jong ki. U la pynpaw ruh ba yn sa ïamir jingmut bad ki nongdon bynta lang ha shwa ban shim ïa kano kano ka rai kaba khatduh halor ki jingpynkylla.
“Nga ïoh mynsiem na ka jingpynthikna jong u Myntri ba yn pynlong ïa ki jingïamir jingmut bad ba yn bishar bniah ïa ki jingeh jong ki nongdon bynta lang ne ki stakeholder,” ong u Sangma, da kaba bynrap ba ka sorkar jylla ka thmu ban ïatreilang ha ka rukom kaba tei bad ka Centre ban pynïahap hapdeng ki jingmyntoi jong ka ri bad ki jingnoh synñiang jong ki seng ai jingïarap bad ki seng kiba pynshong nongrim ha ka jingngeit.
Ka kynhun ka la ban jur ruh ïa ka jingdonkam ban don ki lad jingiada hapoh ka ain ban pynthikna ïa ka jingbteng jong ki jingshakri katba dang pynneh ïa ka jinglong kaba shai bad ka jingkitkhlieh.
“Ngi dang don ka jingkyrmen ba lyngba ka jingiakren bad jingiatreilang, kan mih ka lad ban ïada ia ka hok jong ki seng katba ka dang pynkhlain ïa ki rukom pynïaid”, la ong u Myntri Rangbah ka Jylla.
