Shillong, Risaw 24: U Myntri ka tnat Social Welfare u Bah Paul Lyngdoh ha ka sngi Palei u la ong ba u don ka jingthmu ban ïatreilang bad u MP ka VPP na Shillong u Ricky AJ Syngkon halor ki katto katne ki mat kiba ktah ïa ka jylla bad ki nongshong shnong.
Haba kren sha ki lad pathai khubor na ka liang u Bah Lyngdoh u la ong ba ka jingïalang bad u MP ka long kaba jop.
“Na ka liang u MP u kwah ïa ngi ban ïatreilang ha kiba bun ki bynta khamtam halor ka bha ka miat hapoh ka imlang sahlang bad kumjuh ruh halor ka jingkiew kiba dih kyrni ïa u drok bad ki kam khaiï drok bad kumjuh halor ka jingdon bun ki longiïng kiba don tang ka kmie ne u kpa bad ngi la don ka jingïasyllok bad jingai jingmut kiba kordor shibun,” u la ong.
“Nga la shah shkor bha bad khlem pep ngin don ka jingïatreilang ha ki katto katne ki kam kiba ktah ïa ka bha ka miat jong ka jylla Meghalaya,” ong u Myntri.
