Ïasyllok ka Myntri Pla Tyngka bad u Lat ka jylla halor kiba bun ki kam ban kyntiew ïa ka Meghalaya

Shillong, Naitung 11: Ka Myntri ka sorkar pdeng kaba khmih ïa ka tnat Pla Tyngka bad Corporate Affairs ka Nirmala Sitharaman, ka la leit ban jngoh ïa ka Ïing jong u Lat ka jylla ha Raj Bhavan, Meghalaya, ha ka sngi Thohdieng ha kane ka jingwan jngoh ïa ka jylla ha kine ki lai sngi.
Ïa ka, la pdiang sngewbha da u Lat ka jylla Meghalaya u CH Vijayashankar.
Ha kane ka jingleit jngoh, ka Myntri ka la ïasyllok shibun ki kam bad u Lat ka jylla, khamtam kaba pynleit jingmut halor ka ïoh ka kot jong ka jylla Meghalaya, ki kam ïatreilang, bad ka bynta ban pynkhlaiñ ki jingïarap pisa na ka bynta ki briew kiba sengkam lajong.
Ki la ïakren sani bha halor ki kam ba la sdang ka sorkar pdeng ban kyntiew ïa ka jylla hapoh ka vision ka Viksit Bharat@2047, ba kynthup ka jingpynsuk ban leh ki kam business, ka capacity-building halor ki MSME, bad ban kyntiew ki rukom synshar ba ïatreilang ha kine ki thaiñ shatei lammihngi.
U Lat ka jylla u la pyntip ruh sha Myntri halor ki lad kiba bun ba ka jylla Meghalaya ka don khamtam haba ïadei bad ki kam jngohkai pyrthei, nangta ka kam rep kam riang, ki jingtrei ba la shna da ki kti, bad ki kam pynroi kiba neh, bad u la ïaroh ruh ïa ki jingpyrshang ba bteng ka sorkar pdeng ban wanrah ki rukom treikam ba thymmai kiba long ka jingmyntoi ïa ki jylla ki barit.
Ha kawei ka liang, u Lat u la pynpaw ki jingsngewkhia haba ïadei bad ki lad pynïasoh, ki lad jingtei ha ki jaka pule, bad ka lad ban don ka jingïasyllok hapdeng ka jylla bad ki shnat treikam ka sorkar pdeng ban wanrah ki jingkhuid bad ki jingkheiñ kiba shai halor ki kam corporate.
Ka Sitharaman ka la ïaroh ruh ïa ka jingriewspah ki kolshor bad ka mynsiem ban seng ki kam lajong jong ki nongshong shnong ka jylla Meghalaya.
Ka la banjur ïa ka jingangnud ka sorkar pdeng ban wanrah ka ïoh ka kot kaba ïaryngkat sha baroh ki thaiñ jong ka ri India, bad ka la pynpaw biang ïa ka jingiai kyrshan ka sorkar pdeng ban kyntiew ïa ka jingnang jingtip lyngba ka digital halor ki kam pisa pilaiñ, ban pynkhlaiñ ïa ki kam jingtei halor ki cooperative, bad ka jingdonkam ka jingkhring ïa ki riew shimet ban pynlut hapoh ka jylla.
Hadien ba la wai ka jingïalang, u Lat ka jylla u la aiti ïa ka memento sha ka Myntri kum ka dak ka jingpdiang sngewbha ka jylla Meghalaya ïa ka. Kane ka jingwan jngoh ka la sam ïa ki jingangnud jong ka sorkar pdeng bad ka jylla ban wanrah ki kam pynroi bad ka jingïatreilang ban kyntiew ïa ka ri hi baroh kawei.