Ïasuk ki ar liang mamla hadien ka jingshah ujor halor ki jingkynthoh ba ktah ïa u riewshimet

Jowai, Risaw, 12: Kawei ka jingujor kaba la mudui da u President jong ka Meghalaya People United Front (MPUF) u Bah Bah D. W. Laloo pyrshah ïa ki ar ngut ki briew kiba kynthup ïa u Bah S. Dhar bad ïa ka kong B. Dkhar, kiba la kynthoh ha ka Comment Section ha ka Social Media ha kaba ïadei bad ka khubor ba la pynlong ïa ka jingpynkhalai ïa ki Ticket lucky Draw jong ka Chiïung Multipurpose Society ha kine ki sngi kiba ladep.
Ha kaba ïadei bad kane ka kam, ki nongshah mudui kumjuh ruh u nongmudui ki la leit mih ha Jowai Police Station hakhmat jong u Officer Incharge ha ka sngi Thodieng. Hadien ka jingïakren ki la poi sha ka jingsngewthuh bad ki la rai ban ïasuk bad la pynkut noh ïa kane ka jingujor.
U Bah S. Dhar u la ong ba kumba ujuh ai ïa ki jingkynthoh ha ka Facebook na ka por sha ka por bad na ka bynta kato ka jingkynthoh ha ka khubor jong ka Chiïung um don jingmut ban kynthoh kaba lah ban ktah matïong ïa kiwei.
Ka Kong B. Dkhar ka la ong ba ka jingkynthoh jong ka kam shym la thew ba kan ktah ïa ki jingsngew jong kiwei hynrei ka jingkynthoh jong ka, ka long beit tang ïa ka khubor bad kam poi pyrkhat ruh ba kan ktah kylla ïa ka jingsngew jong kiwei.
U President jong ka MPUF, u la kyntu ïa kiwei de haba ki kynthoh ïa kino kino ki khubor ne ki jingthoh ha ka rynsan Social Media kam dei ban ktah ïa ki riewshimet ne ïa kano kano ka kynhun kaba lah ban wanrah ka jingsngew bitar bad ka jingshah pynjah burom ïa ki hynrei lada kwah ki kwah ban ai ïa kino kino ki jingkynthoh ki lah ban kynthoh tangba da ki jingkynthoh kiba wanrah ïa ka jingtei bad ka jingïatip lem ha ka imlang sahlang ym da ka jingkynthoh kaba pynklumar ne ban pynshit paidbah.
Ha kaba ïadei bad ka khalai nusib jong ka Chiïung Multipurpose Society, u Bah D. Wanmi Laloo u la ong, “ai ba kane ka khalai nusib jong ka Chiïung Multipurpose Society kan long biang kaba ïaid beit ïaid ryntih ha kaba kumno kin leh ha kine ki sngi ban wan kata ka shong ruh ha ka jingstad ka jong ki kum ka Society bad nga kitbok kit rwiang ruh ïa baroh ki dkhot jong ka Chiïung ba lada kin pynkhalai biang kin leh da kaba pynhun ïa ki paidbah khnang ba ki paidbah ruh kin don biang kata ka jingshaniah ha ki.”