Shillong, Naitung 10: Ka sorkar Meghalaya kum ka jingïakhun dohïap ban lait na ka jingkyrduh bording, ka la ïateh kular bad ka NTPC ha nongbah Delhi mynta ka sngi. Ka NTPC kadei ka kynhun jong ki kompeni pynmih bording ha ri India.
Ïa kane ka jingïateh kular la ïasoi da u Sanjay Goyal, CMD ka MEeCL bad u Gurdeep Singh, Chairman bad Managing Director jong ka NTPC ha kaba la ïadon lang u Myntri Rangbah u Conrad Sangma bad u Myntri tnad bording, u AT Mondal.
Ka khubor na ka Chief Minister Office ka ong ba kane ka jingïasoi ne ïateh kular lyngba ka MoU, kan long ka lad ban pynbha ïa ka jingtreikam ka tnad bording ha ka jylla, naduh ka rukom sam bording, nangta ka jingpynmih bording lyngba ka Solar bad kiwei kiwei de ki bor treikam.
U Myntri Rangbah ka jylla u la pynpaw ka jingkyrmen ba kane ka jingïasoi soskular kan ïarap shibun eh ïa ka jylla ha kaba ïadei bad ka jingpynbiang bording elektrik ha ka jylla. Kumjuh ruh u Myntri tnad bording u la ong ba kane ka kan plie lad ia ka jylla ba kan nang khambha shuh shuh ha ka kam sam bording.
