Ïasoi soskular ka Ri Bhoi District bad ka kompani IOCL & NETC ban pynbiang bording ha Civil Hospital bad skul JNV Niangbari

Nongpoh, Rymphang 15 : Ban pynkhlaiñ bad pynjanai ïa ka jingshakri paidbah, ka ophis u Deputy Commissioner ka Ri-Bhoi mynta ka sngi ka la ïasoi soskular bad ar tylli ki Company na ka bynta ban ai jingïarap sha ka Nongpoh Civil Hospital bad ka Jawahar Navodaya Vidyalaya (JNV) Niangbari.
Ka jingïasoi soskular ki kynthup bad ka kompani Indian Oil Corporation Limited (IOCL), kaba la shimti ban ai jingïarap da ka Generator ha Civil Hospital Nongpoh, lem bad ban pynbiang ki jingthiah haki kamra kha khyllung haki CHC bad PHC, bad ruh ka Fundus Slide Camera na ka bynta ki prokram ai jinghikai. Katba ka North East Transmission Company (NETC) kan wanrah ïa ka Solar Power Energy system ha JNV Niangbari ban pynbiang ïa ka jingduna bording ha katei ka jaka pule.
Ha ka jingïasoi soskular la ïadonlang ki nongmihkhmat na kitei ki Company, ba kynthup ïa ka Smt. Malati Malakar, Sr. Manager (HR), IOCL bad u Shri Niranjan Rabha, DGM ka NETC.
Haba kren sha ki lad pathai khubor, u Deputy Commissioner ka Ri-Bhoi u Bah Abhilash Baranwal u la ong ba kane ka sienjam ka long ban pynbha ïa ki jingshakri ha Civil Hospital Nongpoh bad ruh ban pynbiang bording kaba thikna ha JNV Niangbari, kiba ju mad jingeh na ka jingbym biang ka bording.
U la bynrap ba kane ka jingïasoi soskular ka long lyngba ka Corporate Social Responsibility (CSR) jong kitei ki Company, bad kyrmen skhem ba kane kan wanrah jingmyntoi kaba khraw ïa ki paidbah ha katei ka jaka sumar bad ïa ki samla pule ha ka katei ka skul.