ïasoi soskular ka Meghalaya haduh 13 tylli ban pynkhlaiñ bor ïa ki nongkyndong ha ka sengkam thymmai

Shillong, Naitung 25 : Ka Sorkar Meghalaya ha ka sngi Thohdieng, kala ïasoi ia 13 tylli ki soskular ne ki Memorandum of Understanding (MoU) bad ki Technical bad Research Institute, ban pynkhlain bor ïa ki nongshong shnong sha ki thaiñ Nongkyndong ba kin lah sengkam thymmai kat kum ka buit treikam ba ki don.
Ia kine ki MoU la ïasoi ha ka Summit for Rural Empowerment kaba long ha State Convention Centre, Shillong mynta ka sngi.
Kine ki jingïatreilang ba kongsan-hapoh ka Pradhan Mantri Janjatiya Vikas Mission (PMJVM)-ki thmu ban pynkylla ïa ka roi ka par ki jaka nongkyndong da kaba wanrah ïa ki technology, ka jingpynmih ïaki mar ba thymmai, bad ban pynïoh ïa ka ïew ha kylleng ka Ri.
Ki Heh Sorkar kila pynthikna ba sa hynriew tylli ki MoU kila don mynta ha ka jingpynkhreh, ki ban nang pynkhlaiñ shuh shuh ha ka jingkyntiew ïa ka ïoh ka kot ki jaka nongkyndong.
Kine ki sienjam ki phaikhmat eh ha ka jingpynkylla ïa ki mar ba pynmih na ki shnong nongkyndong sha ki mar kiba heh dor, ki mar ki bym don jingktah satia ïa ka mariang.
Ki kam kiban leh ki kynthup ïa ka jingpynkylla ïa ki jaboh ba mih na u sohtrun bad ka kait (snep) sha ka sboh ban rep ban riang bad ki jingsong ïa ki mar ki mata, ban saiñ ïa ki syntiew sha ki kynbat rong sniuh bad gulal, ban shim ïa ki umphniang na ki dieng ba long dawai, bad ban pynmih ïa ki jingbam na ki marrep kum na u kew, phan karo bad phandieng.
Ka Myntri kam Rep kong Ampareen Lyngdoh kala khot ïa ka PMJVM, “ka jingkylla ba ïohi jngai kaba la sei ïa u soh mynta” bad ong ba ki flagship program kum ka CM Farm Plus scheme bad ka State Organic Farming Mission-kaba la pyntrei mynta ha ka jaka ba 52,000 hectare bad ka thong ban kyntiew sha ka 1 lak hectare ha u snem 2028-ka long kaba kongsan bha ban pynkhie im ïa ki jaka nong kyndong ka jylla Meghalaya.
Ka Myntri kala pynpaw ruh ba haduh 169 Vikas Divyangta Vikas Kendras (VDVK) la dep ban mang, kaba ai jingmyntoi ïa palat 50,000 ngut ki briew. Man ki VDVK ki kyrshan ïa 15 tylli ki kynhun Self Help Group-60% ki riewlum-bad tyrwa T.15 lak kum ka jingïarap song pisa ban thied ïa ki tiar ki tar ba donkam, ban ai jinghikai bad ba kyrshan ïa ka kam song ïaki mar ki mata.
U Dr Vijay Kumar D jong ka Meghalaya Basin Management Agency (MBMA) ula ong ba ki MoU kin ïarap ban pynkylla ïa ki VDVK sha ki Viavle Rural Enterprise da kaba pynïasoh ïa ki bad ki Institution kiba don ïa ka kyrdan ha ka Ri. Ula ong ba ïa kine ki soskular la tei halor ka nongrim bala buh da ka PRIME Programme (2018) ka Jylla, bad ka PMJVM kaba la ïaid kat kum ka jingpyrshang jong ka MSRLS, FOCUS, Cooperatives nad Producer Group.
Ula pynkynmaw ruh ïa ka jingïaroh jong ka Myntri Pla Tyngka ka Ri Nirmala Sitharaman ïa ka Meghalaya kaba long kum ka nuksa ïa ka Ri India kaba sngewskhem bad kaba shaniah halade.
U Myntri Rangbah ka Jylla Conrad K Sangma, haba kren ha ka jingiïalang, ula ong ba ka Summit ka pyni ïa ka jingktah jong ka Sorkar \ïa ki Nongrep, ki kynhun ki Kynthei bad ki imlang sahlang ha nongkyndong. Ula pyntip ba kumba 55,000 tylli ki Self Help Group bad don palat 5 lak ngut ki kynthei, la dep ban thaw ha kine ki hynniew snem bad haduh 2 lak ngut ki nongrep bad 20,000 tylli ki kynhun nongrep kila ïoh ia ka jingkyrshan na ka Sorkar.
Haba kren halor ki jingeh kum ka jingslem ban ïoh ïa ki symbai, u Conrad ula kdew ba ka CM Farm Plus Scheme kan wanrah ïa ka jingkylla. Ula pynpaw ruh ba lyngba ka CM Assure Programme, ka Sorkar kala pynlut haduh T.50 klur tang ha ki phra bnai bala leit noh ban tehlakam ïa ka dor ka mur ki marrep kum u synsar bad u kwai.