ïasoi MoU ka SEMAM bad ka NIOS ban pynrung skul ïa ki khynnah ba pep skul shiteng por

Shillong, Jymmang, 31: Ka State Education Mission Authority of Meghalaya (SEMAM), Samagra Shiksha, ka Tnad Pule Puthi ka Jylla, ka la ïasoi soskular Memorandum of Understanding (MoU) bad ka National Institute of Open Schooling (NIOS) ban wad bad pynrung skul biang ïa ki Khynnah ba pep skul shiteng por hapoh ka Jylla.
Ka SEMAM bad ka NIOS ki la ïasoi ïa kane ka MoU ha ka 27 tarik Jymmang ha State Convention Centre, Shillong.
Kiba la ïadonlang ha kane ka sngi ïasoi soskular ki kynthup ïa u Director of School Education & Literacy (DSEL) bad State Project Director SEMAM, Samagra Shiksha u Swapnil Tembe lem bad u Chairperson ka NIOS Prof Saroj Sarma.
Lah ban kdew ba ïa mynta, ka Meghalaya ka don haduh 25 tylli ki NIOS Study Centre ha ki 5 tylli ki District ka Jylla- ka East Khasi Hills, West Jaintia Hills, Ri-Bhoi, East Garo Hills bad West Garo Hills districts.
Ka SEMAM ka la kyrpad ruh ïa ka NIOS ban nang pynbun ïa ka jingdon ki NIOS Study Centre ha ka Jylla khnang ba kin don lang ha kiwei pat ki District ki bym pat don Centre.
Ka State Project Office ka la shimkhia ruh ban pynsaphriang ïa ki khubor lyngba ki kot khubor, FM Radio bad pynlong ïa ki road show campaign bad ka 93.5 red FM halor ka jingpynrung skul biang ïa ki khynnah ba la pep skul shiteng por, ban ïarap ban kyrshan ïa kine ki Khynnah kiba don hapdeng ka rta ba 16-19 snem tad haduh ka klas XII ba kin leit pule biang ha ki NIOS ha East Jaintia Hills bad Ri-Bhoi District.
La ong ba ïa kum kine ki juh ki prokram yn sa pynlong ruh ha kiwei kiwei ki District ba dang sah ban pynsaphriang ïa ka jingtip shaphang ka NIOS naba bun ki Khynnah ba pep skul shiteng por kim don jingtip satia ïa kane ka lad ban ïoh leit pule.