Shillong, Naitung 05: Ïa ka MoU la soi hapdeng ka IIM Shillong, India bad ka Asian Institute of Technology (AIT), Thailand da ka jingthmu ban pynkhlaiñ ka jingïatreilang hapdeng kine ki artylli ki ri, ban kyntiew ïa ka pule puthi bad ka jingïasam ïa ki riti dustur bad ki kolshor lyngba ka jingïakyrshan lang kaba markylliang, khamtam kaba pynleit jingmut ha ka kam hikai bad ki kam wadbniah.
Ïa kane ka prokram ba la ïasoi ïa katei ka MoU la donlang da u Prof. D.P. Goyal, Director of IIM Shillong, bad Prof. Nitin K. Tripathi, Acting Vice President for Academic Affairs ka AIT. Kiwei pat kiba la ïadonlang kidei na IIM Shillong ba kynthup ïa Prof. Naliniprabha Tripathy, Dean ka External Relations, bad Dr. Teidorlang Lyngdoh, Chair ka External Relations. Na ka AIT la mihkhmat da Dr. Roger Levermore, Vice President for Development bad Dean jong ka School of Management (SOM); Dr. Sumana Shrestha, Director of International Affairs ha ka Office of International and Public Affairs (OIPA); u Sanjeet Amatya, Director ka Public Affairs ha OIPA; bad u Zia Islam, Executive Assistant sha u Dean and Coordinator hapoh ka Dean Office, SOM.
Haba ïaid lang bad ka jingthmu ka jaka pule, kum kine ki jingïadei paralok la khmih lynti ba kan ïarap ïa ki samla pule bad ki nongwad bniah ba kin phai ha ki kam jong ki ri ka pyrthei. Ka jingthmu jong kane ka MoU ka long ban pynsuk ïa ka jingïatreilang hapdeng ka IIM Shillong bad ka AIT Thailand lyngba ki prokram kum ka International Dual/Joint Masters bad Doctoral Programs, faculty/student exchange, joint research project, ki lad internship na ka bynta ki samla pule, bad ka jingïapynmynta ïa ki tyllong jingstad kum ki library database, journals, bad ki online resource khnang ban lah kyntiew ïa ka kam pule bad ki jinglah ban leh ïa ki kam wadbniah jong ki nongtrei bad ki samla pule na baroh artylli ki jaka pule.
Halor kane na ka liang u Dr. D.P. Goyal, Director ka IIM Shillong, u la pynpaw ka jingkmen shaphang kane ka jingïatreilang, da kaba ong, ‘Kane ka jingïalong paralok ka ai ka jingtyrwa ïa kiba bun ki lad na ka bynta ki samla pule bad ki nongtrei. U la pynpaw ba kan don ka jingïatreilang kaba bha halor kane ka jingïasoi MoU.
