ïasoi MOU ka Hima Sohra bad ka Concre Infrastructures na ka bynta ka Waste Management Project

Shillong, Risaw 11 : Ban wanrah ïa ka jingkhuid jingsuba, ka Hima Sohra ka la ïasoi ïa ka Memorandum of Uderstanding (MoU) bad ka Concrea Infrastructures Pvt Ltd ban seng noh ïa ka Comprehensive Waste Management Plant ha Sohra. ïa kane ka jingïasoi ïa kane ka soskular la pyndep ha ka 11 tarik mynta u bnai.
ïa kane ka MOU la ïasoi da u Syiem ka Hima Sohra u Paiem Freeman Sing Syiem bad u Dr Sachin Rajmurti u Founder Director jongka Concrea Infrastructures Pvt Ltd kaba dei ka kompani na Guwahati. Kat kum ka soskular la ïakut ba ka Hima Sohra kan ai wai lai acre ka jaka sha ka Kompani tang ha ka dor 10,000 tyngka shisnem bad ban kiew pat ka bai wai 10% man la ka san snem. Ka jingïakut ban ai wai ka long 31 snem bad lada donkam lah ban pynjlan sa 31 snem namar ka shong ha ka jingïaid beit jongka Projek.
Kane ka projek ka dei ruh shi bynta na ka Green Sohra Campaign bad ka dei ruh ka jingpyrshang ban wanrah ïa ka jingkhuid jingsuba kat kum ka jingstad saian khamtam ba ka Sohra ka dei kawei na ki jaka ba kiew bha ka kam jngohkai pyrthei.
Ka nongïoh khusnam Padma Shri ka kong Praticia Mukhim, ka la ïadon bynta ha ka prokram kum ka Special Guest bad ha ka jingkren kala ai ka jingïaroh ïa ka Hima SOhra kaba shim khia ban wanrah ka jingkhuid jingsuba kahtmam lyngba kane ka waste management projek. Ka long kaei kaei kaba sngewdiaw namar ka jiungtuid ki nongwan jngohkai sha Sohra ka la nangjur katba nang ïaid ki snem kumta khlem kane ka jingshimkhia bad khlem kane ka projek kan buh ïa ka thaiñ Sohra haka jingma khamtam ïa ka mariang namar ka jingtuid ki nongwan jngohkai ka la nangkiew. Ka kong Praticia ka la buh ruh ïa u maw nongrim na ka bynta kane ka projek.
Kat kum ka MoU ka Concrea Infrastructures kan bei pisa 20 klur lane palat ban sdang ïa ka Compress Bio Gas Plant kaba pynïakhlad ïa ki niut bad ki plastic khnang ban mih ka sboh dawai organic. Kane ka kompani kan leit lum ruh ïa ki niut ki nier na manla ki thliew ïing, na ki resturant, hotel, ki jaka jngohkai da ka jingïatrei lang bad ka ophis u Syiem.
Ka soskular ka kdew ruh ban ai ka jingmyntoi ïa ki trai shnong bad ka Concrea Infrastructures ka la rai ban ai kam ai jam ïa ki trai shnong kat kum ka jingtbit bad kyrdan jongki. Ban seng ruh ïa ka Skill Development Centre ban ai jinghikai ïa ki samla ha ka rukom pynïaid ïa ki kor ki bor. Ban pyntreikam ï ka CSR Fund na ka bynta ka roi ka par jongka Hima Sohra. Ban ym don kano kano ka jingktah ne jingpynjulor ïa ka mariang bad ban ïada ruh ïa ki shnong ba marjan kum ka Lum Mawkyrdup.
U Bah Alan West, Advisor ka Hima SOhra u la pynpaw ka jingsngewkmen na ka jingwan jong kane ka projek da kaba ong ba ka jingïasoi ïa ka MoU ka long kum u mawjam ba kongsan ha ka hitori jongka Sohra. Haba pynpaw ïa ki jingïaid lynti ba mynshwa u la ong ba ka la buh ha ka jingma ïa ki krem, ki wah bad wat ïa ka mariang bad ym tip shano ka lawei jongka Sohra kan poi lada ym dei ba wan kane ka projek. U kyrmen skhem ba kane ka projek kan sdang noh shen bad kular ruh ïa ka kompani ba kum ki trai shnong kin ai ka jingkyrshan kaba pura ha baroh ki liang. ka MoU ka kren ruh kumno ban ïada bad ban ai jingmyntoi ïa ki trai shnong. Lada ka kompani kam lah ban sdang ïa kane ka projek hapoh lai snem ka jaka kan leit phai noh sha ka Hima Sohra. ïa kane ka jaka dei ban pyndonkam beit tang na ka bynta kane ka projek. Ka Hima Sohra kan long kum ka Consultative Body ka ban ïalam lynti ha kiba bun ki bynta tangba kan ym mushlia ha ka jingtreikam jongka kompani.
U Paiem Freeman u la ong ba kane ka MoU ba la ïasoi ka long kum ka jingsdang kaba thymmai ïa ka Hima Sohra. Ki paid nongshong shnong da ka jingsngewsarong kin ai ka jingïarap ïa ka kompani namar kane ka dei shi bynta ban ïada ïa ka mariang. Nalor kata ka komapni ka la kular ruh ban ai kam ai jam ïa ki khun samla ka Hima Sohra. Na ka Liang u Dr Sachin ul a ong ka thong jongka kompani ka long ban tei ïa ka Model Waste Management System ha Sohra kaba ym dei tang ban weng ïa ka jingeh na ka jingbret pathar ïa ki niut ki nier hynrei kan long ruh ka bynta ba kongsan ban wanrah ïa karoi ka par bad ka jingpynneh pynsah ïa ka mariang ha katei ka thaiñ. ïa kane ka projek la buh thong ban sdang noh hapoh hynriew bnai bad lyngba kane kan wnarah ka jingkhuid, jingjyrngam bad ka mariang kaba itynnad ha kane ka thaiñ.