Ïasoi ka Meghalaya bad ka Kerala CPCRI ban khanglad ïa ka jingpur ka khlam ha ki bri kwai

Shillong, Rymphang 25: Ka jylla Meghalaya kala thaw da ka state level task force (SLTF) bad ka kynhun na ki district, ban sdang noh ïaka jingleh GIS disease mapping bad ban synreit dawai da ki drone, bad ka la ïasoi ïa ka jingïatreilang bad ka Kerala CPCRI ban khanglad ïa ka jingpur jong ka khlam ha ki bri kwai.
Ïa kane, la pyntip da u myntri sorkar ba peit ïa ka tnad ka rep ka riang u Timothy D. Shira ha ka jubab ba la wanrah hapoh ka ïing dorbar thawain ha ka sngi Balang.
U Myntri u la ïathuh ba ïa ki jingpynkhuid jingsuba la pyntip ha ka Meghalaya ONE portal bad la pynsngewthuh ïa ki nongrep halor ka jingithuh bad ban lah tehlakam.
La sam ïa ki kot ai jingmut ba la thoh bad ki stad saian na ICAR, KVK, MBMA bad CPCRI, bad la ïasoi ïa ka MoU bad ka CPCRI Kasaragod ha ka 28 tarik u Risaw 2025 na ka bynta ban pynroi ïa u kwai.
La leh ïa ka jingkhmih bniah da ka GIS ha North Garo Hills naduh ka 28 tarik Kyllalyngkot haduh ka 6 tarik Rymphang 2026 ryngkat ka MBDA bad yn pyniar sha kiwei pat ki district.Kham mynshwa, ka jingpyndon kam da ki drone ban leh ïa ka mapping ha ki shnong ha West Garo Hills (10-14 Nailur 2025) la bud sa ka jingsynreit Bordeaux mixture ba la thmu (10-14 Nailur 2025) da ka NECTAR bad SVM ban thaw ïa ki jaka ïada, ha kaba ka jingpynbna kaba kham heh ka dang don ha ka jingbishar bniah.
La pynbiang ïa ki dawai ba la tip kum ki bio-pesticides, bio-agents bad ki tiar ba la ai jingiarap, la bynrap biang u Shira.
Na ka bynta ki nongrep kiba shah ktah ki jingthung, ka sorkar ka sam da kiwei pat ki jingthung kum ka kait, u sohtrun bad u sohmarit – hapoh ki skhim FDS bad RKVY.